ԵՐԵՎԱՆ, 12 հոկտեմբերի – Sputnik. Ուկրաինայում ջեռուցման սեզոնին բնակարաններում նվազագույն թույլատրելի ջերմաստիճանը կկազմի 16 աստիճան։ Ինչպես հաղորդում է ՌԻԱ Նովոստին, այս հայտարարությունն արել է երկրի վարչապետ Դենիս Շմիգալը։
«Երբ ջեռուցումը միացվի, մենք կոչ ենք անում խնայողաբար օգտագործել գազն ու ածուխը։ Այո՛, դա կնշանակի, որ բնակարաններում իջեցվելու է ջերմաստիճանը։ Նվազագույն թույլատրելի ջերմաստիճանը կլինի 16, իսկ միջինը` 18 աստիճան»,– կառավարության նիստում ասել է Շմիգալը։
Ավելի վաղ Շմիգալը հայտարարել էր, որ Ուկրաինան 90 տոկոսով պատրաստ է ջեռուցման սեզոնին, բայց խորհուրդ էր տվել տաք հագուստ, մոմ և մարտկոցներ ունենալ տներում։
Ուկրաինական ենթակառուցվածքների ուղղությամբ ռուսական հարվածներից հետո այս շաբաթվա սկզբին Ուկրաինայի տարբեր շրջաններում էլեկտրամատակարարման տատանումներ էին առաջացել։ ՌԴ պաշտպանության նախարարությունը հայտարարել էր, որ բարձր ճշգրտության զենքերով հասցված հարվածները հասել են իրենց նպատակակետին։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են արդեն 230-րդ օրը։