ԵՐԵՎԱՆ, 11 հոկտեմբերի – Sputnik. Ատոմային Էներգիայի միջազգային գործակալության (ՄԱԳԱՏԷ) գլխավոր տնօրեն Ռաֆայել Գրոսին բարձր է գնահատել կառույցի ծառայության ժամկետը երկարացնելուն ուղղված քայլերը։ Այս մասին Sputnik Արմենիայի մամուլի կենտրոնում ասաց ատոմային էներգետիկայի փորձագետ, ՀԱԷԿ-ի տնօրենի գլխավոր խորհրդական Գերա Սևիկյանը։
Գերա Սևիկյան
© Sputnik / Aram Nersesyan
«Գրոսին գոհ մնաց իր տեսածից։ Հասկանալով մեր ատոմակայանի վիճակը` հիմնական շեշտը դրեց այն բանի վրա, որ մենք բավականին մեծ գործ ենք արել` վերանորոգել ենք անվտանգության սարքավորումները, որոշ մասը փոխել ենք և բարձրացրել մեր ատոմակայանի ընդհանուր անվտանգությունը։ ՀԱԷԿ–ի ծառայության ժամկետը երկարացնելու համար իրականացված նոր ծրագրով 170 մլն–ից 120 մլն–ն օգտագործվել է»,– նշեց Սևիկյանը։
Նա ընդգծեց, որ ՀԱԷԿ–ը պետք է քայլեր ձեռնարկի մինչ նոր ատոմակայանի կառուցումը` մոտ 10-12 տարի, որպեսզի շարունակի երկարացնել ՀԱԷԿ–ի կյանքը։
Սևիկյանի պնդմամբ` Գրոսիի այդ հայտարարությունից հետո Թուրքիան պետք է որ դադարեցնի շահարկել ատոմակայանի անվտանգության խնդիրը, քանի որ, ըստ նրա, շուրջ 50 տարվա շահագործման ընթացքում երբևէ որևէ վթար չի եղել։
Բացի այդ, մասնագետը նշեց, որ նույնիսկ վթարի դեպքում Մեծամորի նման ատոմակայանների հնարավոր վնասը չի կարող համեմատվել, օրինակ, Չեռնոբիլում տեղի ունեցած աղետի հետևանքների հետ։
Հիշեցնենք` Գրոսին Հայաստանում էր հոկտեմբերի 4-5-ն ընկած ժամանակահատվածում։ Այստեղ գտնվելու ընթացքում նա հայտարարել էր, որ շարունակելու են օգնել Մեծամորի ատոմային էլեկտրակայանին։
Նշենք` Հայաստանի ու Ռուսաստանի մասնագետներն արդեն սկսել են նոր ատոմային էներգաբլոկի նախագծի շուրջ բանակցությունները։ Մասնավորապես քննարկվել է ՋՋԷՌ (Ջրաջրային էներգետիկական ռեակտոր) տիպի ռեակտորի նախնական տեխնիկատնտեսական հիմնավորման կառուցվածքի, ՏՏՀ կատարման տեխնիկական առաջադրանքի և կիրառվելիք նորմատիվ տեխնիկական փաստաթղթերին ու լիցենզավորմանը վերաբերող մոտեցումների քննարկումը:
ՏԿԵ նախարար Գնել Սանոսյանն ավելի վաղ հայտարարել է, որ 2025-2026 թթ ծրագրվում է սկսել նոր ԱԷԿ-ի կառուցումը։