ԵՐԵՎԱՆ, 10 հոկտեմբերի – Sputnik. Բելառուսի նախագահ Ալեքսանդր Լուկաշենկոն հայտարարել է, որ պայմանավորվել է ՌԴ գործընկեր Վլադիմիր Պուտինի հետ տարածաշրջանային համատեղ զորախումբ տեղակայելու մասին, զորախմբի ձևավորումն արդեն երկու օր է, ինչ սկսվել է։
«Միութենական պետության արևմտյան սահմաններին իրավիճակի սրացման հետ կապված մենք պայմանավորվածություն ենք ձեռք բերել ՌԴ և Բելառուսի Հանրապետության տարածաշրջանային զորախումբ տեղակայելու մասին։ Այդ ամենն ամրագրված է մեր փաստաթղթերում։ Եթե սպառնալիքը հասնում է ներկայիս մակարդակի, մենք պետք է գործարկենք Միութենական պետության խմբավորումը», – «Բելտա» գործակալության փոխանցմամբ, նշել է Լուկաշենկոն։
Բելառուսի առաջնորդն այսօր ռազմաուժային բլոկի հետ խորհրդակցության ժամանակ ասել է, որ զորախմբի ձևավորումն արդեն մեկնարկել է։
Լուկաշենկոն հայտարարել է նաև, որ որ ոչ պաշտոնական ալիքներով Մինսկին նախազգուշացրել են, որ Ուկրաինայի տարածքից հանրապետությանը պատրաստվում են հարված հասցնել, և նա հանձնարարել է Կիևին փոխանցել, որ պատասխանը կոշտ է լինելու։
«Մենք պետք է որոշենք, թե ուրիշ ինչ է պետք ձեռնարկել մեր պետության անվտանգությունն ամրապնդելու համար։ Հաշվի առնելով արագ փոփոխվող իրավիճակը», – ասել է Բելառուսի նախագահը։
Նրա կարծիքով` Բելառուսի դեմ Կիևի կողմից ճակատի բացումը խելահեղություն է ռազմական տեսանկյունից, սակայն գործընթացը սկսվել է։
«Ես արդեն ասել եմ, որ Ուկրաինայում այսօր ոչ թե քննարկվում է, այլ նախապատրաստվում է Բելառուսի տարածքին հարվածներ հասցնել։ Իհարկե, ուկրաինացիներին դա բոլորովին պետք չէ։ Ինչի՞ համար է նրանց անհրաժեշտ երկրորդ ճակատ բացել մեր հարավային սահմաններին, իրենց` հյուսիսային։ Ինչո՞ւ։ Չէ՞ որ դա խելահեղություն է զինվորականների տեսանկյունից։ Բայց, այնուամենայնիվ, գործընթացը մեկնարկել է», – ասել է Լուկաշենկոն։
Նա կարծում է, որ նման գործողությունների Ուկրաինային Արևմուտքն է դրդում։
«Նրանց (պաշտոնական Կիևին – խմբ.) տերերը դրդում են Բելառուսի դեմ պատերազմ հրահրել, որպեսզի մեզ ներքաշեն դրա մեջ։ Որպեսզի միանգամից լուծեն և՛ Ռուսաստանի, և՛ Բելառուսի հարցերը», – ասել է Լուկաշենկոն։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ռուսաստանում սեպտեմբերի 21-ից մասնակի զորահավաք է հայտարարվել: Զորակոչվելու է ընդհանուր առմամբ 300 հազար պահեստազորային։ Դա ՌԴ-ի ընդհանուր զորահավաքային ռեսուրսի 1 տոկոսից փոքր-ինչ ավելին է։
Ուկրաինայում մարտական գործողություններն ընթանում են արդեն 228-րդ օրը։