ԵՐԵՎԱՆ, 10 հոկտեմբերի – Sputnik. Եթե Կոսովոյի ինքնորոշման իրավունքը աշխարհի համար ընկալելի է, ինչո՞ւ պիտի Արցախինն ընկալելի չլինի։ Այսօր խորհրդարանական ճեպազրույցների ժամին այս մասին հայտարարեց «Պատիվ ունեմ» խմբաիկցության պատգամավոր Թագուհի Թովմասյանը` հավելելով, որ Հայաստանն աշխարհին այս իրողությունը բացատրելու խնդիր ունի։
«Արցախն Ադրբեջանի կազմում ապագա չունի։ Ադրբեջանի կազմում Արցախի պատկերացումը նշանակում է, որ մենք մեր հայրենակիցներին տանում ենք նոր ցեղասպանության։ Որևէ արցախցի չի կարող Ադրբեջանի կազմում ապրել ապահով, իր իրավունքների պաշտպանությամբ, և ուղղակի չի կարող ապրել»,– ասաց Թովմասյանը։
Անդրադառնալով Ստեփանակերտ–Բաքու ուղիղ բանակցությունների մասին հայտարարություններին` Թագուհի Թովմասյանը նշեց, որ չի պատկերացնում նման ֆորմատ։
«Եթե մենք ասում ենք, որ Արցախը չճանաչված հանրապետություն է, ինչպե՞ս ենք պատկերացնում միջազգային գոծընկերների հետ փոխհարաբերություններւմ նրա կարգավիճակը։ Ուրեմն պետք է առաջին հերթին ճանաչել Արցախը»,– ասաց Թովմասյանը։
Ընդդիմադիր պատգամավորը նաև հերքում է հայտարարությունները, թե Հայաստանն Արցախին աջակցելու ռեսուրս չունի։
«Ես չեմ կարծում, որ մենք ռեսուրս չունենք, բա մեր ռեսուրսն ի՞նչ եղավ։ Լավ, մենք ռեսուրս չունենք սահմանները պահելու, դիվանագիտական ասպարեզում ինչո՞ւ ռեսուրս չունենք։ Այսինքն, մարդ չկա՞, որ գնա բանակցի։ Ինչո՞ւ։ Թուրքիայի հետ կարող ենք բանագնաց նշանակել, Արցախի հարցով չե՞նք կարող»,– ասաց պագամավորը` Հայաստանի իշխանությունների այդ տեսակետն անընդունելի որակելով։
Ընդդիմադիր պատգամավորը նշեց, որ Հայաստանը պարտավոր է ակտիվացնել ԵԱՀԿ ՄԽ–ի ֆորմատը` ներկայացնելով, որ նաև այդ միջազգային ֆորմատից է կախված Արցախի 100-120 հազար հայության գոյությունը։