ԵՐԵՎԱՆ, 9 հոկտեմբերի - Sputnik. Ղրիմի կամրջի ավտոմոբիլային երկու գոտիների երթևեկությունը վերականգնվել է, հայտնել Է ՌԴ փոխվարչապետ Մարատ Խուսնուլինը:
Մինչ այդ կամուրջն աշխատում էր մեկ գոտում հետադարձի ռեժիմով։ Ավտոճանապարհային հատվածում վերականգնել են լուսավորությունը, նոր գծանշում իրականացրել, վերականգնել պատնեշները։ Այժմ կամրջով ավտոմեքենայով հնարավոր կլինի ավելի արագ անցնել»,-գրել է Խուսնուլինը իր Telegram-ալիքում։
Փոխվարչապետը հստակեցրել է, որ կամրջի վնասված հատվածի զննումը դեռ շարունակվում է:
Նա շնորհակալություն է հայտնել շինարարներին, որոնք աշխատում են շուրջօրյա, ուժային բլոկի մասնագետներին, որոնք օգնում են կամրջի վերականգնման աշխատանքների կազմակերպմանը:
Ղրիմի կամուրջի հատվածներից մեկում հոկտեմբերի 8–ին պայթել էր վառելիքով լի ցիստեռնը: Երթևեկությունը կամրջի վրա դադարեցվել էր։ Միջադեպի հետևանքով կամրջի երկու ավտոմոբիլային հատվածները մասամբ փլուզվել են, սակայն կամրջի նավարկելի հատվածի վրայի կամարը վնասված չէ։
Նշենք, որ ՌԴ նախագահ Վլադիմիր Պուտինը հանձնարարել էր վարչապետ Միխայիլ Միշուստինին կառավարական հանձնաժողով ստեղծել՝ Ղրիմի կամրջի վրա տեղի ունեցած արտակարգ պատահարի պատճառները պարզելու ու հետևանքները վերացնելու համար: