ԵՐԵՎԱՆ, 7 հոկտեմբերի – Sputnik. Բաքվից հայրենադարձված 17 հայ ռազմագերիների մասին տեղեկությունները, թե նրանք խոշտանգման չեն ենթարկվել կամ ծանր վիրավորում չեն ստացել, իրականությանը չեն համապատասխանում։ Այս մասին հայտնում է ՀՀ քննչական կոմիտեն։
Ավելի վաղ ԶԼՄ–ները, հղում անելով ՀՀ քննչական կոմիտեի մամուլի քարտուղար Վարդան Թադևոսյանին, գրել էին, որ սեպտեմբերի 13-14-ին ադրբեջանական ԶՈւ–ի ագրեսիայից հետո գերությունից վերադարձած զինծառայողները խոշտանգումների չեն ենթարկվել։ Այսօր կայացած ասուլիսի ժամանակ ՀՀ մարդու իրավունքների պաշտպան Քրիստինե Գրիգորյանը հայտնել էր, որ վերադարձված գերիներից գրեթե բոլորն էլ հայտնել են խոշտանգումների, անգամ բժիշկների կողմից վատ վերաբերմունքի արժանանալու մասին։
Այժմ ՔԿ–ից հայտնում են, որ վերոնշյալ զինծառայողների հետ ՔԿ–ի զինվորական քննչական գլխավոր վարչությունում իրականացվել և այժմ էլ իրականացվում են անհրաժեշտ քննչական և վարութային այլ գործողություններ՝ կատարվել են հարցաքննություններ, փորձաքննություն նշանակելու համար ստացվել են նմուշներ, նշանակվել են դատաբժշկական և այլ փորձաքննություններ, զինծառայողները ներկայացվել են ՀՀ ԱՆ «Դատական բժշկության գիտագործնական կենտրոն» ՊՈԱԿ՝ փորձաքննվելու համար:
«Վերադարձված ռազմագերիների մասնակցությամբ դեռևս ընթացքում են գտնվում հարցաքննությունները, ուստի 2022 թվականի հոկտեմբերի 5-ի դրությամբ քրեական վարույթն իրականացնող մարմինը Քննչական կոմիտեի հասարակայնության հետ կապերի պատասխանատու Վարդան Թադևոսյանին օբյեկտիվորեն չէր կարող տեղեկատվություն տրամադրել դեռևս չավարտված քննչական գործողության արդյունքների վերաբերյալ»,– ասված է հաղորդագրությունում։
Հիշեցնենք` Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ սահմանվեց, որը պարբերաբար խախտում է ադրբեջանական կողմը։
Քննչական կոմիտեն սեպտեմբերի 30-ին հայտնեց, որ ադրբեջանական ագրեսիայի հետևանքով հայկական կողմն ունի 201 զոհ՝ 197 զինծառայող և 4 քաղաքացիական անձ, վիրավորվել է 293 զինծառայող ու 6 քաղաքացիական անձ, գերեվարվել է 20 զինծառայող:
Հոկտեմբերի 4-ին Ադրբեջանն ԱՄՆ–ի միջնորդությամբ Հայաստանին վերադարձրեց 17 գերիների։