ԵՐԵՎԱՆ, 7 հոկտեմբերի – Sputnik. ԱՄՆ–ն չի պատրաստվում անմիջական մասնակցություն ունենալ Ուկրաինայում ընթացող հակամարտությանը։ Այս հայտարարությունն արել է Պետդեպարտամենտի մամուլի ծառայության ղեկավարի տեղակալ Վեդանտ Պատելը։
«Նախագահ Ջո Բայդենը և պետքարտուղար Էնթոնի Բլինկենը հստակ հասկացրել են, որ քանի դեռ ԱՄՆ–ի կամ մեր դաշնակիցների վրա ուղիղ հարձակում չի եղել, ապա չենք պատրաստվում անմիջականորեն ընդգրկվել այդ հակամարտության մեջ` ո՛չ ամերիկյան զինվորներ ուղարկելով, ո՛չ էլ հարձակվելով ռուսական ուժերի վրա»,– ասել է Պատելը` մեկնաբանելով Վլադիմիր Զելենսկու հայտարարությունը։
Ավելի վաղ Զելենսկին, տեսակապով ելույթ ունենալով Ավստրալիայի Լոուի ինստիտուտում, հայտարարել էր, որ ՆԱՏՕ-ն պետք է կանխարգելիչ հարվածներ հասցնի ՌԴ-ին, ոչ թե սպասի Ռուսաստանի միջուկային հարվածներին: Ավելի ուշ Զելենսկու մամուլի քարտուղար Սերգեյ Նիկիֆորովը պարզաբանել էր, որ նա ՌԴ-ի դեմ միջուկային զենք կիրառելու կոչ չի արել, այլ կանխարգելիչ պատժամիջոցներն է նկատի ունեցել։
Պեսկովը ՌԻԱ Նովոստիին ասել է, որ նման խոսքերը ոչ այլ ինչ են, քան համաշխարհային պատերազմ սկսելու կոչ, դրա պատասխանատվությունը պետք է կրեն ԱՄՆ-ն և Մեծ Բրիտանիան, որոնք փաստացի ղեկավարում են Կիևի գործողությունները: Նա նաև ընդգծել էր, որ Զելենսկու խոսքերին պետք է ուշադրություն դարձնեն աշխարհի բոլոր երկրները: Ուկրաինայի նախագահի հայտարարությունները դժգոհություն են հարուցել նաև ՄԱԿ-ում, որտեղ հիշեցրել էին, որ միջուկային հակամարտության վերաբերյալ բանավեճերն անգամ անընդունելի են։