ԵՐԵՎԱՆ, 7 հոկտեմբերի – Sputnik. Ադրբեջանն այլևս չի կարող որևէ տարածքային պահանջ ներկայացնել Հայաստանի ինքնիշխան տարածքի նկատմամբ։ Իր ֆեյսբուքյան էջում այս մասին գրել է ՀՀ հատուկ հանձնարարություններով դեսպան Էդմոն Մարուքյանը՝ անդրադառնալով երեկ տեղի ունեցած Նիկոլ Փաշինյան, Իլհամ Ալիև, Էմանուել Մակրոն, Շառլ Միշել քառակողմ հանդիպմանը։
Մարուքյանն այս ենթադրությունն է արել, քանի որ Ադրբեջանը համաձայնել է Հայաստանը ճանաչել ՄԱԿ-ի կանոնադրության և Ալմա-Աթայի հռչակագրի համաձայն։
ՀՀ հատուկ հանձնարարություններով դեսպանը նշում է, որ ադրբեջանական զինված ուժերը պետք է դուրս գան մինչ այս պահը օկուպացված տարածքներից։
«Ադրբեջանը համաձայնել է համագործակցել ԵՄ քաղաքացիական առաքելության հետ, որը կլինի սահմանի երկայնքով։ Հետևաբար Ադրբեջանի ապագա ագրեսիան մոնիթորինգի կենթարկվի տեղում, ավելին` նաև կարձանագրվի Հայաստանի սուվերեն տարածքի արդեն իսկ օկուպացված հատվածը»,- գրել է Մարուքյանը:
Նա հիշեցրել է նաև, որ ԵՄ դիվանագիտության ղեկավար Ժոզեպ Բորելը 2022թ. հոկտեմբերի 5-ին հայտարարել էր, որ ԵՄ-ն ցանկանում էր դիտորդական առաքելություն ուղարկել շփման գոտի, սակայն Ադրբեջանի դեմ լինելու պատճառով առաքելությունն այդպես էլ չուղարկվեց։
Հիշեցնենք, որ Հայաստանի վարչապետ Նիկոլ Փաշինյանը, Ֆրանսիայի նախագահ Էմանուել Մակրոնը, Եվրոպական խորհրդի նախագահ Շառլ Միշելը և Ադրբեջանի նախագահ Իլհամ Ալիևը հանդիպել են երեկ Պրահայում, որտեղ հավաքվել էին ԵՄ անդամ և գործընկեր չորս տասնյակից ավելի երկրների ղեկավարներ: