ԵՐԵՎԱՆ, 6 հոկտեմբերի – Sputnik. Զանգվածային սքրինգների համար պետության տրամադրած գումարները Լոռու մարզի մի քանի բժշկական հիմնարկներ յուրացրել են, իսկ շահառուները չեն անցել անհրաժեշտ հետազոտություններ։ Այս մասին հայտնում են ՀՀ դատախազությունից։
Ըստ հաղորդագրության, ուսումնասիրություններ են կատարվել մարզի 28 բժշկական հաստատություններում՝ բնակչության ռիսկային խմբերում իրականացված զանգվածային սքրինգների վերաբերյալ պետության կողմից բժշկական հիմնարկներին հատկացված գումարների տնօրինման օրինաչափությունը պարզելու համար:
Ուսումնասիրությունների արդյունքում երեք բժշկական հաստատությունում՝ «Ուռուտի առողջության առաջնային պահպանման կենտրոն» ՊՈԱԿ–ում, «Վարդաբլուրի բժշկական ամբուլատորիա» ՀՈԱԿ–ում, «Ջրաշենի բժշկական ամբուլատորիա» ՀՈԱԿ–ում, հայտնաբերվել են հանցագործության հատկանիշներ պարունակող տվյալներ:
«Պարզվել է, որ «Ուռուտի առողջության առաջնային պահպանման կենտրոն» ՊՈԱԿ–ում 63 շահառուներ չեն անցել անհրաժեշտ հետազոտություններ, «Վարդաբլուրի բժշկական ամբուլատորիա» ՀՈԱԿ–ում ՝ 36, «Ջրաշենի բժշկական ամբուլատորիա» ՀՈԱԿ–ում՝ 22 շահառուներ, սակայն այդ անձանց անվամբ պետության կողմից նշված կենտրոնին փոխանցվել են գումարներ»,- ասվում է դատախազության տարածած հաղորդագրությունում։
Այսպիսով, ի հայտ են եկել պաշտոնատար անձանց կողմից, ծառայողական լիազորություններն օգտագործելով, խաբեությամբ պետությունից գումարներ հափշտակելու և պաշտոնատար անձի կողմից պաշտոնական փաստաթղթերում կեղծ տեղեկություններ կատարելու մասին վկայող տվյալներ:
Նախաձեռնվել է երեք քրեական վարույթ։ Նախաքննությունը հանձնարարվել է Հակակոռուպցիոն կոմիտեին: