ԵՐԵՎԱՆ, 5 հոկտեմբերի – Sputnik. Այս գիշեր Իրանի հյուսիս-արեւմուտքում տեղի ունեցած երկրաշարժի հետեւանքով շուրջ 400 մարդ է տուժել։ Տեղեկությունը հայտնում է «Fars» գործակալությունը՝ հղում անելով Խոյ շրջանի իշխանություններին:
«Այս պահին տուժածների ընդհանուր թիվը 390 է, որոնցից 135-ը հոսպիտալացվել են», - գործակալությունը մեջբերել է մարզի արտակարգ իրավիճակների վարչության հայտարարությունը:
Նշվում է, որ շուրջ 25 տներ 50-100 տոկոսով վնասվել են։
Երկրաշարժից հետո գրանցվել է մոտ 30 հետցնցում։
ՀՀ արտակարգ իրավիճակների նախարարությունն ավելի վաղ հայտնել էր, որ հոկտեմբերի 5-ին` տեղական ժամանակով 04:21-ին Իրանում` Մարանդ քաղաքից 9 կմ հարավ-արևմուտք, օջախի 10 կմ խորությամբ, 5․5 մագնիտուդով երկրաշարժ է գրանցվել: Էպիկենտրոնային գոտում ստորգետնյա ցնցման ուժգնությունը կազմել է 7-8 բալ: Երկրաշարժը զգացվել է Սյունիքի մարզում (5-6 բալ), Վայոց Ձորի, Արարատի մարզերում (3-4 բալ), Կոտայքի մարզում, Երևանում և Արցախի Հանրապետության Ստեփանակերտ քաղաքում (3 բալ)։