ԵՐԵՎԱՆ, 4 հոկտեմբերի - Sputnik. Կարմիր խաչի միջազգային կոմիտեն (ԿԽՄԿ), որպես չեզոք միջնորդ, մասնակցել է հայ գերիներին հայրենիք վերադարձնելու գործընթացին։ Այս մասին ասված է Հայաստանում ԿԽՄԿ պատվիրակության տարածած հաղորդագրության մեջ, որը հրապարակվել է սոցցանցերում։
Ավելի վաղ հաղորդել էինք, որ Բաքուն ԱՄՆ միջնորդությամբ Երևանին է հանձնել 17 հայ ռազմագերիների:
«Վերադարձածների թվում կային անձինք, որոնց մենք այցելել էինք սեպտեմբերի 23-ին»,-նշվում է հաղորդագրության մեջ:
Սեպտեմբերի 23-ին Կարմիր խաչի միջազգային կոմիտեի ներկայացուցիչներն այցելել էին Ադրբեջանի զինված ուժերի վերջին ագրեսիայի ժամանակ գերության մեջ հայտնված հայերին։ Նրանք ծանոթացել էին գերիներին պահելու պայմաններին, նրանց առողջական վիճակին, օգնել էին կապ հաստատել ընտանիքների հետ:
Հիշեցնենք, որ ՀՀ վարչապետ Նիկոլ Փաշինյանն ավելի վաղ հայտարարել էր, որ Բաքուն երկու անգամ խախտել է ռազմագերիներին վերադարձնելու մասին պայմանավորվածությունը: Նրա խոսքով՝ առաջին դեպքը եղել է մայիսին, երբ Բրյուսելում բանակցությունների ժամանակ խոստում էր տրվել, իսկ երկրորդը` վերջերս, երբ Վաշինգտոնում Ադրբեջանը պարտավորվել էր մինչև սեպտեմբերի 30-ը ազատ արձակել 17 հայ ռազմագերիների:
Ավելի ուշ Հայաստանի Անվտանգության խորհրդի քարտուղար Արմեն Գրիգորյանը հաստատել էր, որ Վաշինգտոնում ԱՄՆ նախագահի ազգային անվտանգության հարցերով խորհրդական Ջեյք Սալիվանի և Ադրբեջանի նախագահի օգնական Հիքմեթ Հաջիևի հետ հանդիպման ժամանակ պայմանավորվածություն է ձեռք բերվել 17 ռազմագերիների վերադարձի մասին: