ԵՐԵՎԱՆ, 4 հոկտեմբերի — Sputnik. Ռուսաստանի ներքին գործերի նախարարությունը հատուկ գործողությամբ կասեցրել է գումար շորթող խմբի գործունեությունը։
Կադրերում երևում են հատուկ նշանակության ջոկատայինները, որոնք տղամարդկանց պառկեցնում են գետնին ու ձեռնաշղթաներ հագցնում։ Մեղադրյալների բնակարաններում խոշոր գումարներ են հայտնաբերվել։
Հոկտեմբերի 4-ին հայտնի էր դարձել երեք մարդու ձերբակալության մասին, որոնք զբաղվել են ռուսական ընկերությունների բարձրաստիճան պաշտոնյաներին ու թոփ-մենեջերներին շանտաժի ենթարկելով։ Ձերբակալվածներից մեկը Մոսկվայի բնակիչ է, 50 տարեկան, մյուսը նրա որդին է, երրորդը` Ուլյանովսկի բնակիչ։ Նրանք քրեական բիզնեսով զբաղվող ալիքների սեփականատերերն ու ադմինիստրատորներն են։
ՆԳՆ-ի տվյալով՝ համացանցային խաբեբաները Telegram-ում ցանց են ստեղծել, 900 հազար բաժանորդ հավաքել, իսկ հետո պատվիրված նյութեր հրապարակել խոշոր գործարարների ու պաշտոնյաների մասին վարկաբեկող տեղեկություններով։ Հրապարակումները ջնջելու համար գումար են պահանջել։ Տուժածները ստիպված են եղել ամեն ամիս վճարել շորթողներին։
Հարուցվել են քրեական գործեր ՌԴ Քրեական օրենսգրքի 163 հոդվածով («շորթում»)։ Ձերբակալվածներից առգրավել են էլեկտրոնային սարքեր, նոթատետրեր և քննության համար նշանակություն ունեցող առարկաներ։