ԵՐԵՎԱՆ, 4 հոկտեմբերի – Sputnik. ՀՀ Անվտանգության խորհրդի քարտուղար Արմեն Գրիգորյանը Բրյուսելում հանդիպել է Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինայի հետ։
Այս մասին Կոլոմինան հայտնել է Twitter-ի իր միկրոբլոգում։
«Հայաստանի Անվտանգության խորհրդի քարտուղարի հետ մենք քննարկել ենք տարածաշրջանում տիրող իրավիճակը, Հայաստանի և Ադրբեջանի հարաբերությունների կարգավորման ընթացքը` Ժնևում ԱԳ նախարարների հանդիպումից հետո»,– հայտնել է Կոլոմինան։
ՆԱՏՕ-ի ներկայացուցիչը հայտնել է, որ ՆԱՏՕ–ն աջակցում է Հայաստանի ու Ադրբեջանի հարաբերությունների կարգավորմանը։
Ավելի վաղ հայտնել էինք, որ այսօր ԱԽ քարտուղար Արմեն Գրիգորյանն աշխատանքային այցով մեկնում է Բրյուսել: Գրիգորյանը մինչ այս ԱՄՆ–ում էր։ Նա աշխատանքային հանդիպումներ էր ունեցել Կենտրոնական հետախուզական գործակալության` Լենգլիում գտնվող գլխամասային գրասենյակում:
Սեպտեմբերի 28-ին ԱՄՆ նախագահ Ջո Բայդենի ազգային անվտանգության հարցերով խորհրդական Ջեյք Սալիվանի միջնորդությամբ Վաշինգտոնում կայացել էր Արմեն Գրիգորյանի հանդիպումը Ադրբեջանի նախագահի օգնական Հիքմեթ Հաջիևի հետ։ ՀՀ Անվտանգության խորհրդի քարտուղարը հանդիպում էր ունեցել նաև ԱՄՆ Ներկայացուցիչների պալատի հայկական հանձնախմբի համանախագահ Ֆրանկ Փալոնի հետ։