ԵՐԵՎԱՆ, 4 հոկտեմբերի – Sputnik. Կառավարությունն առաջարկում է զորակոչային տարիքն ավելացնել 1 տարով` գործող 27 տարեկանի փոխարեն սահմանելով 28 տարեկանը։
«Զինվորական ծառայության և զինծառայողի կարգավիճակի մասին» օրենքում ու կից օրենքներում համապատասխան փոփոխությունների նախագիծն այսօր ԱԺ–ին ներկայացնելիս ԿԳՄՍ նախարար Վահրամ Դումանյանը հայտնեց, որ այդ անհրաժեշտությունն առաջացել է այն պատճառով, որ հաճախ ուսման մեջ հաջողությունների հիմքով տարկետում ստացած սովորողները, ասպիրանտուրան չավարտած, զորակոչվում են բանակ։
«Այս խնդիրն առաջացել է այն հանգամանքից, որ հանրակրթության տևողությունը դարձել է 12 տարի, իսկ 27 տարին որոշվել է այն ժամանակ, երբ հանրակրթությունը դեռ 10 տարի տևողություն ուներ։ Սա բերում է արհեստական լուծումների. ասպիրանտուրայի երկրորդ տարում փորձում էին ամեն կերպ ավարտել, պաշտպանել դիսերտացիան, որպեսզի համարվի, որ այդ ցիկլը փակվել է»,– ասաց Դումանյանը։
«Զինվորական ծառայության և զինծառայողի կարգավիճակի մասին» օրենքում ու կից օրենքներում փոփոխությունների նախագիծը ՀՀ կառավարությունն ընդունել էր այս տարվա հուլիսին ու այն ուղարկել ԱԺ–ի քննարկմանը։ Օրինագծերի փաթեթը խորհրդարանը նախորդ շաբաթ ընդունել է առաջին ընթերցմամբ։