ԵՐԵՎԱՆ, 3 հոկտեմբեր – Sputnik. Հոկտեմբերի 5-ին «Երևան Expo» կենտրոնում կբացվի «Expo Russia-Armenia 2022» միջազգային արդյունաբերական ցուցահանդեսը։ Այս մասին լրագրողների հետ հանդիպմանը հայտարարեց «Զարուբեժ Expo» ընկերության ցուցահանդեսային նախագծերի ղեկավար Սվետլանա Զաբելինան։
Հայաստանում Ռուսաստանի առևտրային ներկայացուցիչ Աննա Դոնչենկոն էլ նշեց, որ ցուցահանդեսին այս տարի մասնակցելու են ավելի քան 30 ռուսական ընկերություններ։
«Յուրաքանչյուր ընկերության համար մենք պատրաստել ենք գործընկերների ցանկ և գործնական ծրագիր, հույս ունեմ բոլորի հետ հանդիպել և անձամբ շփվել, քանի որ մեզ համար կարևոր է պահպանել մեր հարաբերությունների բարձր աստիճանը»,- ասաց Դոնչենկոն։
Խոսելով Հայաստանի և Ռուսաստանի միջև ապրանքաշրջանառության դինամիկայի մասին նա նշեց, որ միայն դրական փոփոխություններ են նկատվում․
«2022 թվականի առաջին կեսին երկրների միջև ապրանքաշրջանառությունը կազմել է 2 մլրդ դոլար, սա անցյալ տարվա նույն ժամանակահատվածի համեմատ 50 տոկոսով ավել է»:
Աննա Դոնչենկոն վստահ է, որ այսպիսի ցուցահանդեսները հարթակ են նոր նախագծերի ստեղծման համար։
«Expo Russia-Armenia 2022» միջազգային արդյունաբերական ցուցահանդեսին ներկայացված կլինեն տարբեր ոլորտների ընկերություններ: Դա թույլ կտա համագործակցություն հաստատել ավելի լայն շրջանակններում, համոզված է «Զարուբեժ Expo» ընկերության միջազգային համագործակցության գծով տնօրեն Անատոլի Նիկոլաևը։
«Մեր ցուցահանդեսում կարևոր է գործնական ծրագիրը։ Հայաստանում մի առանձնահատկություն կա՝ ծրագիրը միշտ իրականացնում ենք անմիջապես նախարարություններում, ինչը բարձրացնում է արդյունավետությունը։ Հոկտեմբերի 7-ին կլոր սեղան է լինելու գիտության և կրթության, տրանսպորտի, էներգետիկայի, բժշկության և առողջապահության ոլորտներում համագործակցության վերաբերյալ»,- ասաց Անատոլի Նիկոլաևը։
Ցուցահանդեսն անցկացվում է Ռուսաստանի և Հայաստանի միջև տնտեսական, գիտատեխնիկական, մշակութային և քաղաքական, առևտրատնտեսական և ներդրումային հարաբերությունների զարգացման նպատակով: