Միջանցքային անվերահսկելի ուղիները կարող են խնդրահարույց լինել նաև ՌԴ–ի համար. քաղաքագետ

Ռուսաստանն ինքն էլ շահագրգռված չէ, որպեսզի Ադրբեջանին և Թուրքիային տրամադրվեն ճանապարհներ, որոնցով նրանք կարող են ազատորեն, առանց հսկողության տեղափոխել ամեն ինչ։ Sputnik Արմենիայի հետ զրույցում նման կարծիք հայտնեց քաղաքագետ Հրանտ Մելիք–Շահնազարյանը։

ՌԴ նախարարների կաբինետի փոխնախագահ Ալեքսեյ Օվերչուկը Երևանում կայացած «Հայ–ռուսական բիզնես–երկխոսություն 2022» գործարար առաքելությունից, միջտարածաշրջանային համաժողովից հետո «Ռոսիսկայա գազետային» տված հարցազրույցում ասել է, որ Մոսկվան, Երևանն ու Բաքուն «արտատարածքային միջանցք» ստեղծելու հարց չեն քննարկում։

Մելիք–Շահնազարյանը հիշեցրեց, որ Հայաստանը ԵԱՏՄ անդամ է, որտեղ գործում են միասնական մաքսային կանոնակարգեր, հետևաբար ՀՀ–ի գործող և ապագայում շահագործվելիք մաքսատները ենթակա են բոլոր այն կարգավորումներին, որոնք ընդունվել են ԵԱՏՄ շրջանակներում։ Հարցն այն չէ` մաքսատունը հայկակա՞ն է, թե՞ ռուսական։ Խնդիրն այն է, որ ԵԱՏՄ մաքսային բոլոր կանոնակարգերը պետք է գործարկվեն Հայաստանի սահմաններում։

«Արտատարածքային միջանցքի կարգավիճակի բացառության մասին ՌԴ փոխվարչապետ Ալեքսեյ Օվերչուկը հայտարարություններ արել է նաև նախկինում, երբ նոր էր մեկնարկել երեք երկրների փոխվարչապետերի մակարդակով հանձնախմբի գործունեությունը։ Հստակ նշվում էր, որ միջանցքային տրամաբանությամբ լուծումներ չեն լինելու։ Հայտարարությունների, քաղաքական գնահատականների մակարդակում ներկայացվում է մեկ իրողություն, որ տարվող աշխատանքները միանգամայն այլ բնույթի են»,– ասաց Մելիք–Շահնազարյանը։

Նշենք, որ տարածաշրջանային հաղորդակցությունների ապաշրջափակման մասին պայմանավորվածությունը ձեռք է բերվել Ռուսաստանի, Հայաստանի և Ադրբեջանի առաջնորդների` 2021 թվականի հունվարի 11-ին Մոսկվայում կայացած հանդիպման ժամանակ։ Այդ նպատակով որոշվել է երեք երկրների փոխվարչապետների մակարդակով աշխատանքային խումբ ստեղծել, որը կկենտրոնանա տարածաշրջանում տրանսպորտային և տնտեսական կապերի կարգավորման վրա։