ԵՐԵՎԱՆ, 1 հոկտեմբերի – Sputnik. ՀՀ քննչական կոմիտեն նոր մանրամասներ է հայտնել Տավուշի մարզի Բերդ համայնքում սեպտեմբերի 25-ին կայացած ընտրություններից հետո հարուցված քրգործից։
Ավելի վաղ ՔԿ–ն հայտնել էր, որ Բերդի համայնքապետարանի աշխատակազմի քարտուղարին և նույն համայնքի Ներքին Կարմիրաղբյուր բնակավայրի վարչական ղեկավարին մեղադրանք է ներկայացվել քրեական օրենսգրքի 211-րդ հոդվածի հատկանիշներով (քարոզչություն կատարելուն կամ քարոզչություն կատարելուց հրաժարվելուն հարկադրելը կամ քարոզչություն կատարելուն այլ կերպ խոչընդոտելը): Վերջիններս կալանավորված են։
«Բերդի համայնքապետարանի վարչական շենքում՝ համայնքապետի, համայնքապետի տեղակալի, աշխատակազմի քարտուղարի աշխատասենյակներում, կատարվել են խուզարկություններ։ Դրանց արդյունքում հայտնաբերվել են 80 անձանց տվյալներ պարունակող ձեռագիր գրառումներով ցուցակներ՝ ստորագրություններով։ Հայտնաբերվել են նաև Բերդի համայնքապետարանի ենթակայության տակ գտնվող կազմակերպությունների ղեկավարների՝ համայնքապետի տեղակալին հասցեագրված աշխատանքից ազատվելու վերաբերյալ դիմումներ, որոնց ընթացք չի տրվել»,–ասված է հաղորդագրության մեջ։
Բացի այդ, աշխատակազմի քարտուղարի բջջային հեռախոսահամարը վերահսկելու արդյունքում պարզվել է, որ նա և նույն համայնքի Ներքին Կարմիրաղբյուր բնակավայրի վարչական ղեկավարը, ընտրություններին նախորդող ժամանակահատվածում հեռախոսով զրուցել են ՀՈԱ կազմակերպության տնօրենի ԺՊ-ի նկատմամբ ազդեցություն գործադրելու և այդ կերպ նրան «Զորավոր համայնքի» օգտին նախընտրական քարոզչություն կատարելուն հարկադրելու մասին։
Հիշեցնենք` սեպտեմբերի 30-ին հայտնի դարձավ, որ Բերդ խոշորացված համայնքի ղեկավարի պաշտոնակատար Սամվել Հովսեփյանը կալանավորվել է։
Իսկ գործող համայնքապետ Հարություն Մանուչարյանը կալանավորված է դեռ անցած տարվանից։ Նա սեպտեմբերի 25-ին անազատության վայրից վերընտրվեց իր պաշտոնում՝ հաղթելով ՔՊ–ի թեկնածու Վահրամ Սուքիասյանին։