ԵՐԵՎԱՆ, 30 սեպտեմբերի – Sputnik. Ֆրանսիան աշխատում է, որպեսզի միջազգային հանրությունը ճիշտ գնահատի և մատնանշի, թե ով է ագրեսորը։ Այս մասին Գեղարքունիք կատարած այցի ընթացքում «Ժողովուրդ» օրաթերթի թղթակցին ասել է ՀՀ–ում Ֆրանսիայի արտակարգ եւ լիազոր դեսպան Անն Լույոն։
Հայաստանում հավատարմագրված դիվանագիտները, միջազգային կառույցների ներկայացուցիչները երեկ այցելել էին Գեղարքունիքի մարզի Սոթք բնակավայր` ծանոթանալու Ադրբեջանի ԶՈւ–ի կողմից ՀՀ ինքնիշխան տարածքի նկատմամբ իրականացված ագրեսիայի հետևանքներին
«Այստեղ իրավիճակն իսկապես լուրջ է, և Ֆրանսիան ու ԱՄՆ-ն մասնավորապես աշխատում են այս ուղղությամբ, որպեսզի մյուս երկրներն էլ ակտիվանան։ Հատկապես մենք լուռ չենք, մենք ասել ենք, թե ով է ագրեսորը։ Հուսով ենք՝ մյուս երկրներն էլ կտեսնեն, և այս իմաստով այս այցն իսկապես կարևոր է»,– ասել է դեսպանը։
Անդրադառնալով հայ–ադրբեջանական սահմանին միջազգային դիտորդական առաքելություն տեղակայելու հարցին` ֆրանսիացի դիվանագետն ասել է. «Մենք աջակցում ենք այդ գաղափարին, աշխատում ենք այդ ուղղությամբ, բանակցում ենք այլ երկրների հետ»:
Հիշեցնենք` Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ է սահմանվել, որը պարբերաբար խախտում է ադրբեջանական կողմը։
Այս պահին հայտնի է, որ լայնածավալ ագրեսիայի հետևանքով զոհվածների և անհետ կորածների թիվը հասնում է 210-ի, այդ թվում զոհվել է քաղաքացիական 4 անձ, 1 քաղաքացիական անձի գտնվելու վայրը համարվում է անհայտ, վիրավորվել է 293 զինծառայող, 6 քաղաքացիական անձ, գերեվարվել է 20 զինծառայող: