ԵՐԵՎԱՆ, 29 սեպտեմբերի – Sputnik. Ադրբեջանի զինված ուժերի ագրեսիայի հետևանքով ամենամեծ տարածքային կորուստներն ունեցել ենք Ջերմուկի հատվածում։ Հայաստանում հավատարմագրված դեսպանների հետ հանդիպման ժամանակ տեղեկությունը հայտնեց ԳՇ պետի տեղակալ Առաքել Մարտիկյանը։
«Ադրբեջանի ԶՈւ-ին հաջողվել է մի քանի մարտական դիրք գրավել Վարդենիսում։ Սակայն եթե այդ դիրքերը մարտավարական տեսանկյունից այդքան կարևոր չեն, ապա կարևոր են ռազմավարական տեսանկյունից։ Դրանք անմիջապես կախված են մեր բնակավայրերի վրա, այդտեղից կարողանում են որոշակիորեն հսկողություն սահմանել ճանապարհների վրա, հոգեպես ճնշում են մոտակա գյուղերին իրենց ներկայությամբ»,–ասաց Մարտիկյանը` չհրապարակելով կորցրած դիրքերի քանակը։
Նրա խոսքով` նոր հարձակման վախ չկա, սակայն հայկական ԶՈւ-ն միշտ սպասում է նոր սադրանքների, քանի որ Ադրբեջանը փորձելու է խնդիրը լուծել հօգուտ իրեն։ Մարտիկյանը հավելեց` նման պարագայում դիրքերի իրար մոտը կամ հեռու լինելը ռազմական որևէ նշանակություն չունի։
Մարտիկյանը հավելեց, որ Վերին Շորժայի ուղղությամբ դեռևս զոհված զինվորների մարմիններ են մնացել, և Հայաստանի զինված ուժերը գիտեն, թե որտեղ են դրանք գտնվում: Սակայն Ադրբեջանի ԶՈւ–ն ինտենսիվ կրակով է պատասխանել հայկական կողմի` մարմինները դուրս բերելու բոլոր փորձերին:
Հիշեցնենք` Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
Նիկոլ Փաշինյանը սեպտեմբերի 16-ին կառավարության նիստի ժամանակ հայտնեց, որ հայկական կողմի զոհերի ճշտված թիվը 135 է։
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ է սահմանվել, որը պարբերաբար խախտում է ադրբեջանական կողմը։
ՀՀ Անվտանգության խորհուրդը սեպտեմբերի 19-ին հայտարարեց, որ զինված ուժերի լայնածավալ ագրեսիայի հետևանքով զոհվածների և անհետ կորածների թիվը հասնում է 207-ի, այդ թվում զոհվել է քաղաքացիական 3 անձ, 2 քաղաքացիական անձանց գտնվելու վայրը համարվում է անհայտ, վիրավորվել է 293 զինծառայող, 7 քաղաքացիական անձ, գերեվարվել է 20 զինծառայող:
Սեպտեմբերի 28-ին հայտնի դարձավ, որ Ադրբեջանի զինված ուժերի ստորաբաժանումները, որոնք ապօրինաբար գտնվում են Հայաստանի ինքնիշխան տարածքում, հերթական անգամ խախտելով հրադադարի ռեժիմը՝ օգտագործելով ականանետներ և խոշոր տրամաչափի հրաձգային զինատեսակներ, կրակ են բացել սահմանի արևելյան ուղղությամբ, ինչի հետևանքով հայկական կողմը զոհվել է երեք մարդ: