ԵՐԵՎԱՆ, 29 սեպտեմբերի – Sputnik. Սոթքի ոսկու հանքն այս պահին աշխատում է։ Գեղարքունիք այցելած Հայաստանում հավատարմագրված դեսպանների հետ հանդիպման ժամանակ ասաց Գեղարքունիքի մարզպետ Կարեն Սարգսյանը։
«Ռազմական գործողությունների ընթացքում դադարեցվել էր Սոթքի հանքի գործունեությունը։ Այնուհետև ևս 3 օր չի աշխատել հանքը։ Այս պահի դրությամբ հանքն աշխատում է, բայց իր հզորության 40 տոկոսով»,–ասաց մարզպետը։
Նրա խոսքով` այս պահին աշխատակիցների անվտանգությունն ապահովված է։ Սակայն նրանք մտավախություն ունեն, որ հանքի տարածքում նույնպես կարող են բախումներ լինել։
Հիշեցնենք` Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ է սահմանվել, որը պարբերաբար խախտում է ադրբեջանական կողմը։
Այս պահին հայտնի է, որ լայնածավալ ագրեսիայի հետևանքով զոհվածների և անհետ կորածների թիվը հասնում է 210-ի, այդ թվում զոհվել է քաղաքացիական 4 անձ, 1 քաղաքացիական անձի գտնվելու վայրը համարվում է անհայտ, վիրավորվել է 293 զինծառայող, 6 քաղաքացիական անձ, գերեվարվել է 20 զինծառայող: