ԵՐԵՎԱՆ, 27 սեպտեմբերի – Sputnik. Հյուսիսային Օսեթիայի «Վերին Լարս» անցակետում ծանուցագրեր կհանձնվեն ոչ միայն Հյուսիսային Օսեթիայի, այլև ՌԴ այլ շրջանների բնակիչներին, որոնք ենթակա են զորակոչի: Տեղեկությունը հայտնում է տարածաշրջանի ղեկավարի և կառավարության մամուլի ծառայությունը։
Ավելի վաղ տարածաշրջանի ՆԳՆ-ն տեղեկացրել էր, որ «Վերին Լարս» անցակետում զորահավաքային կետ է տեղակայվելու: Հյուսիսային Օսեթիայի իշխանությունը նախկինում ասել էր, որ Վերին Լարսի անցակետում Վրաստանի հետ սահմանի ծանուցագրերը հանձնում են միայն Հյուսիսային Օսեթիայի բնակիչներին։
«Հանրապետության մուտքի և Վերին Լարսի անցակետում կազմակերպվել են շարժական օպերատիվ խմբեր, որոնք կազմված են զինկոմիսարիատների և գործադիր իշխանության մարմինների ներկայացուցիչներից։ Օպերատիվ խմբերի խնդիրն է ՌԴ պաշտպանության նախարարության ցուցակներին համապատասխան ծանուցագրեր հանձնել զորակոչի ենթակա քաղաքացիներին։ Հյուսիսային Օսեթիայի ղեկավար Սերգեյ Մենյայլոն ընդգծել է, որ այժմ դա վերաբերելու է նաև այն քաղաքացիներին, որոնք զինվորական հաշվառման են կանգնած ոչ միայն Հյուսիսային Օսեթիայի տարածքում, այլև երկրի այլ շրջաններում», - ասված է հաղորդագրության մեջ:
Նշվում է, որ մինչ օրս Հյուսիսային Օսեթիայի զինկոմիսարիատն ունեցել է մասնակի զորահավաքի ենթակա ու Հյուսիսային Օսեթիայում զինվորական հաշվառման մեջ գտնվող քաղաքացիների ցուցակ:
«Ծանուցագրի հանձնումը չի նշանակում, որ մարդուն միանգամից զորակոչային տեղամաս են տանում։ Սակայն յուրաքանչյուր մարդ պետք է հասկանա, որ եթե նա հայտնվել է մասնակի զորահավաքի ենթակա քաղաքացիների ցուցակում, ՌԴ նախագահի հրամանագրի համաձայն` զինկոմիսարիատ չներկայանալը կհանգեցնի օրենքում ամրագրված հետևանքների՝ ընդհուպ մինչև քրեական պատասխանատվություն: Նաև ուզում եմ ընդգծել, որ այդ աշխատանքը կատարվելու է երկրի նախագահի հրամանագրում ամրագրված չափանիշներին համապատասխան», – ընդգծել է Մենյայլոն։
Ռուսաստանում մասնակի զորահավաք է հայտարարվել սեպտեմբերի 21-ից: Ինչպես ավելի վաղ նշել էր ՌԴ պաշտպանության նախարար Սերգեյ Շոյգուն, այն անհրաժեշտ է 1000 կմ երկարությամբ շփման գծի և Ուկրաինայի ազատագրված տարածքների վերահսկողության համար: Զորահավաքի ընթացքում զորակոչվելու է ընդհանուր առմամբ 300 հազար պահեստազորային, դա ՌԴ-ի ընդհանուր զորահավաքային ռեսուրսի 1 տոկոսից փոքր-ինչ ավելին է։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են արդեն 215-րդ օրը։