ԵՐԵՎԱՆ, 26 սեպտեմբերի – Sputnik. Պաշտպանության նախարարության առջև հավաքված ծնողների հետ անցակետի մոտ զրուցել է ՊՆ ներկայացուցիչը։
Հայտնել էինք, որ ՊՆ–ի մոտ էին հավաքվել այն զինծառայողների հարազատները, որոնցից հայ–ադրբեջանական սահմանին տեղի ունեցած ռազմական բախումներից հետո լուր չկա։
«Մեզ ասացին` սպասեք, որոնողական աշխատանքները շարունակվում են և լուր լինի, կպատասխանենք։ Իմ որդին` զինծառայող Սամվել Աթանյանը, 2 ամսվա զինվոր էր. նրան սեպտեմբերի 12-ին տարել են Ներքին Հանդ` ինժեներական աշխատանքների։ Դրանից հետո որևէ լուր չկա մեր տղաներից, վերջին անգամ տեսել են շինաշխատանքներ կատարելիս։ Մեզ ասում են, որ կան զոհվածներ, վիրավորներ»,–ասաց Հայկ Անթանյանը։
Հայկ Անթանյան
© Sputnik / Aram Nersesyan
Նրա խոսքով` դիվիզիոնի հրամանատարը ողջ է, սակայն իրենց հետորևէ մեկը չի հանդիպել և որևէ լուր չեն տալիս ծնողներին։ Անթանյանը նշեց, որ ծնողներին հաջողվել է միայն անտառապահի հետ զրուցել։
Տղամարդը հայտնեց, որ իր մյուս` փոքր որդին և քրոջ որդին այժմ նույն` Կապանի զորամասում են ծառայում։ Նա հավելեց, որ հանդիպման արդյունքներից գոհ չէ։
Մեկ ուրիշ տղամարդ էլ հայտնեց` ՊՆ-ից իրենց խորհուրդ են տվել «Թեժ գիծ» զանգել, տեղեկատվություն ստանալ։
Հիշեցնենք` Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
Նիկոլ Փաշինյանը սեպտեմբերի 16-ին կառավարության նիստի ժամանակ հայտնեց, որ հայկական կողմի զոհերի ճշտված թիվը 135 է։
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ է սահմանվել, որը պարբերաբար խախտում է ադրբեջանական կողմը։
ՀՀ Անվտանգության խորհրդի հայտարարության համաձայն` Ադրբեջանի զինված ուժերի լայնածավալ ագրեսիայի հետևանքով զոհվածների և անհետ կորածների թիվը հասնում է 207-ի, այդ թվում զոհվել է քաղաքացիական 3 անձ, 2 քաղաքացիական անձի գտնվելու վայրը համարվում է անհայտ, վիրավորվել է 293 զինծառայող, 7 քաղաքացիական անձ, գերեվարվել է 20 զինծառայող: