ԵՐԵՎԱՆ, 26 սեպտեմբերի – Sputnik. Հիմա Արցախն այնպիսի իրավիճակում է, որ Հայաստանը որևէ խոսք չունի ասելու։ Արցախում Հայաստանը դերակատար չէ։ Հանրային հեռուստաընկերության եթերում նման հայտարարություն արեց ՀՀ առաջին նախագահ Լևոն Տեր–Պետրոսյանը։
«Խնդրի լուծման բանալին Ռուսաստանի ձեռքում էր մինչև ռուս–ուկրաինական պատերազմը։ Հիմա Ռուսաստանն այնքան խնդիր ունի, որ այդ բանակին կորցրել է։ Կարիբյան ճգնաժամից հետո այսպիսի վտանգավոր իրավիճակ չի եղել։ Կարելի է ասել` սա տասնապատիկ ավելի խորը ճգնաժամ է»,–ասաց նա։
Նա նշեց, որ Հայաստանի և Ռուսաստանի միջև հարաբերություններն ավելի կառուցողական կլինեին, եթե այս նոր իրողությունը` ռուս–ուկրաինական պատերազմը չլիներ։
«Հիմա ամեն ինչն է խառնվել, ու շատ ավելի վտանգավոր իրավիճակ է ստեղծվել մեզ համար»,–ասաց նա` հավելելով, թե չի ուզում ոչ մեկին հուսահատեցնել, բայց «Արցախի հարցն արդեն լուծվել է»։
Համեմատելով Ռուսաստանի, ԱՄՆ-ի և ԵՄ-ի հնարավորությունները ԼՂ հակամարտության կարգավորման հարցում՝ Տեր Պետրոսյանն ընդգծեց, որ այս իրավիճակում, երբ Ռուսաստանի կարողությունները փոքր–ինչ թուլացել են Ուկրաինայի հետ պատերազմի պատճառով, ԱՄՆ-ն ու ԵՄ-ն հնարավորություն ունեն ավելի չբարդացնել Հայաստանի վիճակը։
Այս հարցում, ըստ նրա, ամեն ինչ կախված է նրանից, թե Վաշինգտոնն ու Բրյուսելը որքանով կխրվեն ռուս–ուկրաինական պատերազմի խնդիրների մեջ։