ԵՐԵՎԱՆ, 26 սեպտեմբերի – Sputnik. Ադրբեջանական զինծառայողները սպանել են ՀՀ զինծառայողին, տեսանկարել ու լուսանկարել նրան սպանված վիճակում, ապա «WhatsApp»-ի միջոցով ուղարկել են նրա կնոջը, հետո տեսանյութը և լուսանկարը հրապարակել են նաև «WhatsApp»-ի «story» բաժնում: Տեղեկությունը «Ֆեյսբուք» սոցիալական ցանցում հրապարակել է «Թաթոյան» հիմնադրամը։
Ըստ հաղորդագրության՝ տեսանյութում ՀՀ այլ զինծառայողներ էլ են եղել, որոնք զոհվել են խմբով:
«Հայաստանի դեմ 2022թ. սեպտեմբերի 13-15-ը Ադրբեջանի սանձազերծած պատերազմի ընթացքում ադրբեջանական զինված ծառայողները, բացի ֆիզիկական տառապանքներից, նաև հոգեկան տառապանքներ են պատճառել ՀՀ սպանված զինծառայողների ընտանիքներին: Նշված օբյեկտիվ ապացույցները հիմնադրամի կողմից կստանան անհրաժեշտ իրավական ամրագրում»,- նշում է կառույցը։
Հիմնադրամը հիշեցնում է, որ այս նույն դեպքերն արձանագրվել են նաև 2016թ-ի ապրիլյան և 2020թ-ի 44-օրյա պատերազմների ժամանակ:
«Այսինքն՝ ձեռագիրը չի փոխվում, այս հանցանքները դարձել են խրոնիկ, քանի որ դաժանությունները խրախուսվում են ադրբեջանական իշխանությունների կողմից, իսկ այն կատարողները մնում են անպատիժ»,- գրված է հաղորդագրությունում:
«Թաթոյան» հիմնադրամը պատրաստվում է ապացույցները ուղարկել միջազգային գործընկերներին։
Հիշեցնենք` Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
Նիկոլ Փաշինյանը սեպտեմբերի 16-ին կառավարության նիստի ժամանակ հայտնեց, որ հայկական կողմի զոհերի ճշտված թիվը 135 է։
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ է սահմանվել, որը պարբերաբար խախտում է ադրբեջանական կողմը։
ՀՀ Անվտանգության խորհրդի հայտարարության համաձայն` Ադրբեջանի զինված ուժերի լայնածավալ ագրեսիայի հետևանքով զոհվածների և անհետ կորածների թիվը հասնում է 207-ի, այդ թվում զոհվել է քաղաքացիական 3 անձ, 2 քաղաքացիական անձի գտնվելու վայրը համարվում է անհայտ, վիրավորվել է 293 զինծառայող, 7 քաղաքացիական անձ, գերեվարվել է 20 զինծառայող: