ԵՐԵՎԱՆ, 26 սեպտեմբերի - Sputnik. Սյունիքի մարզի Ներքին Հանդ գյուղը սեպտեմբերի 13-14-ի ադրբեջանական ագրեսիայի հետևանքով առանց վարելահողերի և արոտավայրերի է մնացել։
2021-2022 թթ.-ին Ադրբեջանի ԶՈւ-ն Ներքին Հանդի հատվածում Բարդութաղք (Բարթազ) լեռան շրջանում մոտ 9 քառակուսի կիլոմետր տարածք է զավթել։ Վերջին հարձակման արդյունքում ադրբեջանական զինուժը, կոպիտ հաշվարկով, կրկնապատկել է իր կողմից վերահսկվող տարածքը։
Այսպիսով` հարևան բլուրների լանջերին գտնվող արոտավայրերը և վարելահողերը հայտնվել են կա՛մ նրանց վերահսկողության տակ, կա՛մ «չեզոք գոտում»` Հայաստանի և Ադրբեջանի զինված ուժերի դիրքերի միջև։
«Ադրբեջանցիները մեր բոլոր դաշտերի վրա նստած են։ Հող մշակելը էլ վերջ, մոտենալ չես կարող։ Մտածում ենք` մնացած կովերն էլ վաճառենք»,-Sputnik Արմենիային ասացին տեղի բնակիչները։
Նրանք նշեցին նաև, որ ստեղծված պայմաններում ո՛չ հող մշակելու, ո՛չ անասուններն արածացնելու տեղ չունեն։
Հակառակորդի փաստացի վերահսկողության տակ են հայտնվել նաև հին գյուղը, ինչպես նաև մոտակա բլուրներից մեկի լանջին գտնվող գերեզմանոցը։ Ադրբեջանի ԶՈւ-ի դիրքերը մի քանի հարյուր մետրի վրա են։
Հիշեցնենք, որ սեպտեմբերի 13-ի գիշերվանից սկսած ադրբեջանական զինուժը ինտենսիվ հրետանային գնդակոծության է ենթարկել հայկական բանակի դիրքերը, ինչպես նաև Սյունիքի, Վայոց Ձորի և Գեղարքունիքի խաղաղ բնակավայրերը։ Տարբեր ինտենսիվությամբ մարտեր էին ընթանում տարբեր ուղղություններով՝ Սոթք, Վարդենիս, Արտանիշ, Գորիս, Կապան, Ջերմուկ, Իշխանասար, Ներքին Հանդ։
Սեպտեմբերի 14-ի երեկոյան պայմանավորվածություն է ձեռք բերվել հրադադարի մասին։
Սեպտեմբերի 19-ի դրությամբ հայկական կողմից զոհվածների և անհետ կորածների թիվը 207 է, զոհվածների թվում կա երեք խաղաղ բնակիչ։
Վիրավորվել է 293 զինծառայող և 7 խաղաղ բնակիչ։ Առնվազն 20 զինվորական գերի է ընկել։