ԵՐԵՎԱՆ, 24 սեպտեմբեր – Sputnik, Խաչիկ Չախոյան. Ազգերի լիգայի B լիգայի 1–ին խմբի նախավերջին տուրում Հայաստանի հավաքականը սեփական հարկի տակ խոշոր՝ 0։5 հաշվով զիջեց Ուկրաինայի ընտրանուն։
Ուկրաինայի ընտրանու ֆուտբոլիստները
© Sputnik / Andranik Ghazaryan
Ազգերի լիգայի Հայաստան-Ուկրաինա խաղին երկու կողմերն էլ ներկայացել էին բավականին լուրջ կորուստներով։ Ուկրաինայի հավաքականը մի քանի օր առաջ Շոտլանդիայի ընտրանու հետ տեղի ունեցած խաղից հետո լուրջ փոփոխություններ էր կատարել մեկնարկային կազմում։
Հայաստանի հավաքականը շատ լավ սկսեց Ուկրաինայի դեմ խաղը։ Լուկաս Սելարայանը և Վահան Բիչախչյանը լրջորեն սպառնացին Անդրեյ Լունի պաշտպանած դարպասին։
Թվաց, որ ոգևորության ալիքի ներքո մենք կշարունակենք գրոհներ իրականացնել ու վերջապես կհասնենք հաջողության։ Բայց գնդակը հայտնվեց մեր դարպասում։
Դիրքային գրոհ կազմակերպելով` բազմաքայլ կոմբինացիայի շնորհիվ ուկրաինացիներն առաջ անցան հաշվի մեջ։
Բաց թողած գոլն անկասկած լավ ազդեցություն չունեցավ մեր ֆուտբոլիստների վրա։ Բայց մեր թիմը, բնականաբար, չհրաժարվեց պայքարելուց։
Պարզապես Ուկրաինայի հավաքականը հիմնականում եզրային գրոհներով լուրջ սպառնալիքներ էր ստեղծում մեր ընտրանու պաշտպանության համար։ Հյուրերին հաջողվեց խաղը շարունակել իրենց ձեռնտու տեմպով։ Ուկրաինան վերահսկում էր խաղը։
Երկրորդ խաղակեսում էլ հանդիպման ընթացքը չփոխվեց։ Զգացվում էր մեր մրցակցի ավելի բարձր կարգը։ Ուկրաինայի հավաքականը գործում էր շատ հանգիստ, շատ վստահ և օգտագործելով եզրային գրոհները` նորից ու նորից սպառնում մեր դարպասին։
Երկրորդ գոլը շատ նման էր առաջինին։ Միայն թե այն տարբերությամբ, որ հետևեց փոխանցում աջ եզրից, ու գրոհը եզրափակվեց հարձակման կենտրոնից։
Նորից աչքի ընկան երկու Ալեքսանդրները՝ Տիմչիկը փոխանցեց, Զուբկովը` խփեց։ 0։2։
Այս գոլից հետո մեր թիմն արդեն կարծես թե վայր դրեց զենքերը։ Արտյոմ Դովբիկի խփած գնդակը, համենայն դեպս, դրա ապացույցն էր։
Չգիտես ինչու` մեր տուգանային հրապարակում բարձրահասակ Դովբիկի դեմ պայքարում էր ցածրահասակ Բայրամյանը։ Այդ պատճառով էլ առանց ցատկելու Դովբիկը երրորդ գնդակն ուղարկեց մեր դարպասը։
Իսկ Դանիլո Իգնատենկոյի գոլը պարզապես ապացուցեց, թե ինչքան ուժեղ է Ուկրաինան, և ինչ վիճակում է գտնվում Հայաստանի հավաքականը։
Դե, իսկ Դովբիկի հեթական գնդակն այս խաղում ոչինչ չավելացրեց մեր տեսածին, բացի հաշվից։
Պարտվեցինք 0։5 հաշվով։
Հաջորդ խաղը Ազգերի լիգայի ընթացիկ խաղարկությունում մեր հավաքականն անցկացնելու է սեպտեմբերի 27-ին։ Այդ օրը մեր ընտրանին Դուբլինում մրցելու է Իռլանդիայի հավաքականի հետ։