ԵՐԵՎԱՆ, 24 սեպտեմբերի – Sputnik. Ադրբեջանը նոր տարածքներ է գրավել Հայաստանում՝ ի հավելումն 2021 թ. մայիսից զավթումների: ԵԽԽՎ-ում ՀՀ ԱԺ պատվիրակության անդամ Արմեն Գևորգյանը այս մասին հայտարարել է Թուրքիայի Իզմիր քաղաքում կայացած Եվրոպայի խորհրդի խորհրդարանական վեհաժողովի սոցիալական, առողջապահության և կայուն զարգացման հարցերի հանձնաժողովի նիստում: Գևորգյանի ամբողջական ելույթը հրապարակվել է ՀՀ ԱԺ կայքում։
Գևորգյանն ընդգծել է, որ սեպտեմբերի 13–ի ագրեսիան ոտնահարել է Ռուսաստանի, Եվրամիության և Միացյալ Նահանգների միջնորդությամբ ընթացող բանակցությունները:
«Սեպտեմբերի 15-ին ՄԱԿ-ի Անվտանգության խորհրդի գրեթե բոլոր անդամներն անհատապես խստորեն քննադատել են խաղաղության հանդեպ այս ոտնձգությունը և հորդորել վերադառնալ բանակցություններին»,–ասել է նա`շեշտելով, որ որոշ անդամներ հստակ մատնանշել են ագրեսոր պետությանը:
Նրա խոսքով` ԵԽԽՎ–ի անդամ պետությունը (Ադրբեջանը,–խմբ.) պարբերաբար հարձակվում է մեկ այլ անդամ պետության վրա (Հայաստանի,–խմբ.), իսկ Եվրոպայի խորհրդին չի հաջողվում ակտիվ քայլեր ձեռնարկել:
«Այս կազմակերպությունը, ի տարբերություն շատ այլ կազմակերպությունների, նախընտրում է սահմանափակվել անորոշ և անհասկանալի հայտարարություններով, խուսափում է օբյեկտիվ գնահատականներից և օրինախախտ պետության դեմ պատժամիջոցներից»,–ասել է նա:
Գևորգյանն ընդգծել է, որ հայ ժողովուրդը հրաժարվում է հավատալ, որ Կասպից ծովի գազին և նավթին հասնելու խոստումը կարող է մթագնել ԵԽԽՎ–ին անդամակցողների միտքը:
«Չենք ուզում տեսնել թյուրքական պետությունների գլոբալ ծրագրերը՝ ֆիզիկապես միավորելու իրենց պետությունների առանձին հատվածները Հայաստանի ինքնիշխան տարածքի օկուպացմամբ կամ բռնակցմամբ և հարյուրավոր անմեղ քաղաքացիների կյանքի գնով»,–ասել է ԵԽԽՎ-ում ՀՀ ԱԺ պատվիրակության անդամը։
ՀՀ Անվտանգության խորհրդի հայտարարության համաձայն` Ադրբեջանի զինված ուժերի լայնածավալ ագրեսիայի հետևանքով զոհվածների և անհետ կորածների թիվը հասնում է 207-ի, այդ թվում զոհվել է քաղաքացիական 3 անձ, 2 քաղաքացիական անձի գտնվելու վայրը համարվում է անհայտ, վիրավորվել է 293 զինծառայող, 7 քաղաքացիական անձ, գերեվարվել է 20 զինծառայող:
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ է սահմանվել, որն ադրբեջանցիներն առաջին անգամ խախտեցին սեպտեմբերի 20–ին` կրակելով Սյունիքի մարզի Ներքին Հանդի ուղղությամբ։