ԵՐԵՎԱՆ, 15 սեպտեմբեր, Sputnik - Խաչիկ Չախոյան. Ազգերի լիգայի խմբային փուլի Հայաստան-Ուկրաինա խաղից առաջ պաշտպան Հրայր Մկոյանն ու հավաքականի մարզիչ Խոակին Կապառոսը հուսով են դրական արդյունքի հասնել։
Ասուլիսի սկզբում ընդունված ավանդույթի համաձայն նախ հարցերին պատասխանեց հավաքականի ֆուտբոլիստը։
Հրայր Մկոյան
© Sputnik / Andranik Ghazaryan
Հայաստանի հավաքականի բազմափորձ պաշտպան Հրայր Մկոյանը նշեց, որ շատ լավ գիտակցում են, թե ինչպիսի թիմերի հետ են խաղալու վերջին երկու խաղերում, և ինչ առաջադրանք ունի մեր ընտրանին․
«Ուկրաինայի և Իռլանդիայի հավաքականները ուժեղ թիմեր են, որտեղ հանդես են գալիս բարձրակարգ ֆուտբոլիստներ։ Բայց մեր թիմն էլ պատրաստ է նրանց հետ խաղերին։ Մասնավորապես, ուկրաինացիների հետ խաղում մենք ձգտելու են մեզ համար դրական արդյունքի հասնել։ Ունենք առաջադրանք պահպանել տեղը B լիգայում, և դա անելու համար թիմի ֆուտբոլիստները մարտական տրամադրվածությամբ են դուրս գալու խաղադաշտ։ Ուկրաինան ուժեղ թիմ է, բայց հաղթել նրանց հնարավոր է», - ասել է Մկոյանը։
Խոակին Կապառոսն իր հերթին նշեց, որ կան որակազրկված ֆուտբոլիստներ, որոնց բացակայության պայմաններում նրանց փոխարինողները խաղադաշտում պետք է ամեն ինչ անեն թիմի հաջողությունն ապահովելու համար։ Իսկ Սարգիս Ադամյանի բացակայության համար մեղադրեց ֆուտբոլիստին, ու պատճառներն իմանալու համար հորդորեց զանգել Ադամյանին․ «Ադամյանի բացակայության մեղավորը ինքն է՝ Սարգիսը։ Ուզո՞ւմ եք իմանալ, թե ինչո՞ւ չի հրավիրվել հավաքական՝ զանգեք իրեն։ Ինչ վերաբերում է Սպերցյանին, ապա նա ամեն խաղում առաջադիմում է, բայց ես հուսով եմ, որ խաղադաշտում նրան փոխարինողը լավ հանդիպում կանցկացի ու կօգնի մեր թիմին դրական արդյունքի հասնելու համար», - ասաց Կապառոսը։
Խոակին Կապառոս
© Sputnik / Andranik Ghazaryan
Ասուլիսի ընթացքում հարց հնչեց Կապառոսի ապագայի վերաբերյալ՝ արդյոք նա կշարունակի աշխատել Հայաստանի հավաքականում։ Իսպանացի մասնագետի պատասխանն էր․ «Ուկրաինա, Ուկրաինա, Ուկրաինա»։
Պարզ է, որ մարզչի աշխատանքը կախված է թիմի արդյունքներից։ Ընդ որում ոչ միայն Ուկրաինայի հավաքականի հետ։ Այդ հանդիպումից երեք օր անց մեր ընտրանին մրցելու է Իռլանդիայի հավաքականի հետ։
Այսպիսով, վերջին տեղից խուսափելու համար Հայաստանի հավաքականը պետք է հաղթանակ տանի Ուկրինայի և Իռլանդիայի հավաքականների հետ խաղում։ Վաղը՝ սեպտեմբերի 24-ին առաջին մրցավեճն է, և հիմա բոլորի ուշադրությունը այդ խաղի վրա է բևեռված։