ԵՐԵՎԱՆ, 22 սեպտեմբերի – Sputnik. Մասնակի զորահավաքի շրջանակում զորակոչման ենթակա են շարքային, սերժանտական կազմի քաղաքացիները մինչև35 տարեկան, կրտսեր սպաները՝ մինչև 50, ավագ սպաները՝ մինչև 55 տարեկան: Տեղեկությունը հայտնել է ՌԴ ԶՈւ գլխավոր շտաբի կազմակերպչական-զորահավաքային վարչության ներկայացուցիչ, փոխծովակալ Վլադիմիր Ցիմլյանսկին։
Ցիմլյանսկու խոսքով՝ մասնակի մոբիլիզացիայով զորակոչված ռուսաստանցիները ամեն ամիս գումար կստանան կոչումի ու պաշտոնին համապատասխան, ինչպես նաև հավելավճարներ կստանան։ Նրանք կկարողանան մասնակիորեն կամ ամբողջությամբ հարազատներին փոխանցել այդ գումարը:
Նա տեղեկացրել է նաև, որ մասնակի զորահավաքի շրջանակում զորակոչից ազատվել են պաշտպանական արդյունաբերական համալիրի ձեռնարկությունների աշխատակիցները, առողջական վիճակի պատճառով ժամանակավորապես ոչ պիտանի համարվողները, ինչպես նաև մինչև 16 տարեկան չորս և ավելի երեխա ունեցող քաղաքացիները:
Ռուսաստանցիները, որոնք զինվորական հաշվառման մեջ են և կարճաժամկետ ուղևորության համար արտասահման են մեկնել, մասնակի մոբիլիզացիայիշրջանակում ենթակա են զորակոչի:
Հիշեցնենք՝ ՌԴ նախագահի հրամանագրով սեպտեմբերի 21-ից մասնակի զորահավաք է հայտարարվել։ ՌԴ ՊՆ նախարար Սերգեյ Շոյգուի խոսքով՝ ընդհանուր առմամբ զորակոչվելու է 300 հազար պահեստազորային. դա ՌԴ մոբիլիզացիոն ռեսուրսի 1%-ն է։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են արդեն 210-րդ օրը։