ԵՐԵՎԱՆ, 21 սեպտեմբերի – Sputnik. Երեկ Սյունիքի մարզի Ներքին Հանդ համայնքի ուղղությամբ Ադրբեջանի ԶՈւ–ի կրակոցների հետևանքով հայկական կողմը վնասներ չի կրել։ Եռաբլուրում լրագրողների հետ զրուցում ասաց ՊՆ մամուլի քարտուղար Արամ Թորոսյանը։
«Որևէ վնաս արձանագրված չէ։ Այսօր` առավոտյան 8։30-ի տվյալներով, շփման գծում իրավիճակը մնում է նույնը»,–ասաց նա։
Հարցին, թե ճի՞շտ են լուրերը, որ երեկ Ներքին Հանդում հակառակորդի կրակոցի հետևանքով մեկ զինծառայող է վիրավորվել` Թորոսյանը պատասխանեց, որ ցանկացած վիրավորի մասին ՊՆ–ն պաշտոնական հաղորդագրություն է տարածում։
Լրագրողները հետաքրքրվեցին, թե կա արդյո՞ք որևէ փոփոխություն Ջերմուկի մատույցներում գտնվող ադրբեջանական խմբի մասին, որի առնչությամբ ավելի վաղ ԶՈւ գլխավոր շտաբի պետ Էդվարդ Ասրյանն ասել էր` խումբը զրկված է կենսունակությունից, կողքերից շրջափակված է մեր ստորաբաժանումներով։ Ի պատասխան Թորոսյանը նշեց` ներկայացրած իրավիճակից հետո իրադրության որևէ փոփոխություն տեղի չի ունեցել։
Ինչ վերաբերում է դիրքային կորուստներ ունենալ–չունենալուն, Թորոսյանը նշեց` կորուստների ճշգրտման աշխատանքներ են իրականացվում և այդ աշխատանքներն ամփոփելուց հետո կներկայացնեն արդյունքը։
Հիշեցնենք` Ադրբեջանի ԶՈւ ստորաբաժանումները սեպտեմբերի 13-ից Գորիսի, Սոթքի և Ջերմուկի ուղղությամբ ինտենսիվ կրակ էին վարում հրետանային միջոցներից, խոշոր տրամաչափի հրաձգային զինատեսակներից։ Հակառակորդը կիրառում էր նաև ԱԹՍ-ներ:
Նիկոլ Փաշինյանը սեպտեմբերի 16-ի կառավարության նիստի ժամանակ հայտնեց, որ հայկական կողմի զոհերի ճշտված թիվը 135 է։
ՀՀ Անվտանգության խորհրդի հայտարարության համաձայն` Ադրբեջանի զինված ուժերի լայնածավալ ագրեսիայի հետևանքով զոհվածների և անհետ կորածների թիվը հասնում է 207-ի, այդ թվում զոհվել է քաղաքացիական 3 անձ, 2 քաղաքացիական անձի գտնվելու վայրը համարվում է անհայտ, վիրավորվել է 293 զինծառայող, 7 քաղաքացիական անձ, գերեվարվել է 20 զինծառայող:
Սեպտեմբերի 14-ի ժամը 20։00-ից հայ-ադրբեջանական սահմանի երկայնքով հրադադարի ռեժիմ է սահմանվել, որն ադրբեջանցիները խախտել են սեպտեմբերի 20–ին` կրակելով Սյունիքի մարզի Ներքին Հանդի ուղղությամբ։