ԵՐԵՎԱՆ, 21 սեպտեմբերի – Sputnik. Հայաստանի Հանրապետության անկախության 31-ամյակի կապակցությամբ և Ադրբեջանի կողմից վերջին ագրեսիայի համատեքստում ի համերաշխություն Հայաստանի՝ այսօր Փարիզի քաղաքապետարանի վրա ծածանվել են Հայաստանի Հանրապետության դրոշները։ Համապատասխան լուսանկարները հրապարակվել են Ֆրանսիայում ՀՀ դեսպանության ֆեյսբուքյան էջում։
Նշենք, որ այսօր Ֆրանսիայի նախագահ Էմանուել Մակրոնն Անկախության տոնի առթիվ շնորհավորել է ՀՀ նախագահ Վահագն Խաչատուրյանին։
Նա ընդգծել է, որ իր երկիրը հաստատակամ է շարունակել գործունեությունը՝ հօգուտ տարածաշրջանում խաղաղության և բարգավաճման։
Նշենք, որ Հայաստանի անկախության տոնի առթիվ այսօր արդեն շնորհավորական ուղերձներ էին հղել ՌԴ նախագահ Վլադիմիր Պուտինը և ԱՄՆ պետքարտուղար Էնթոնի Բլինկենը։
Հիշեցնենք, որ 1990 թվականի օգոստոսի 23-ին Գերագույն խորհուրդն ընդունեց Հայաստանի Անկախության հռչակագիրը, ըստ որի՝ Հայկական ԽՍՀ-ին փոխարինվեց անկախ Հայաստանի Հանրապետության։ 1991 թվականի սեպտեմբերի 21-ին հանրաքվեի ժամանակ 2 միլիոն 56 հազար 758 մարդկանց 99 տոկոսը քվեարկեց ԽՍՀՄ-ից Հայաստանի դուրս գալու օգտին, որից հետո սեպտեմբերի 21-ը նշվում է որպես Հայաստանի անկախության օր։
Այս տարի Անկախության տոնին նվիրված բոլոր տոնակատարությունները չեղարկվել են Հայաստանի դեմ ադրբեջանական ագրեսիայի պատճառով։