ԵՐԵՎԱՆ, 20 սեպտեմբերի – Sputnik. Զապորոժիեի ԱԷԿ–ում ենթակառուցվածքներ են վնասվել ուկրաինական զորքի կողմից իրականացրած հրետակոծության հետևանքով։ Այս մասին հայտնում է ՌԻԱ Նովոստին` հղում անելով Էներգոդարի վարչակազմի մամուլ ծառայությանը։
Ավելի վաղ ուկրաինական զորքը Զապորոժիեի ԱԷԿ–ին հարված էր հասցրել բեկորաֆուգասային արկերով։
«Ուկրաինայի ԶՈւ–ի սադրիչ հրետակոծության հետևանքով արձանագրվել է, որ Զապորոժիեի ԱԷԿ–ի տարածքում մի շարք ենթակառուցվածքներ են վնասվել»,–ասվում է հաղորդագրության մեջ։
Մասնավորապես վնասվել են հատուկ մասնաշենքը, սառեցման համակարգը, ինչպես նաև ճաշարանը, որտեղ հրետակոծության պահին գտնվել են կայանի աշխատակիցները։
«Կայանի աշխատակիցների և տարածքը հսկող Ռոսգվարդիայի զինծառայողների շրջանում տուժածներ չկան», – ընդգծել են վարչակազմում։
Հատուկ գործողության ժամանակ ՌԴ զինվորականները վերահսկողության տակ են վերցրել Զապորոժիեի մարզի մերձազովյան հատվածն ու Խերսոնի մարզն ամբողջությամբ` զբաղեցնելով այնպիսի խոշոր քաղաքներ, ինչպիսիք են Խերսոնը, Մելիտոպոլը և Բերդյանսկը` կտրելով Ուկրաինան Ազովի ծովից։
Երկու շրջաններում էլ նոր վարչակազմեր են ձևավորվել, ռուսական հեռուստաալիքներ և ռադիոկայաններ են հեռարձակվում, վերականգնվում է Ղրիմի հետ առևտրային և տրանսպորտային կապը։ Շրջանները հայտարարել են ՌԴ կազմի մեծ մտնելու իրենց ծրագրերի մասին։