ԵՐԵՎԱՆ, 20 սեպտեմբերի - Sputnik. Գրոսմայստեր Լևոն Արոնյանը հայտարարել է, որ հասկանում է աշխարհի գործող չեմպիոն նորվեգացի Մագնուս Կարլսենին ամերիկացի Հանս Նիմանի հանդեպ նրա վերաբերմունքի հարցում, հայտնում է chess24.com-ը։
Ավելի վաղ նորվեգացի շախմատիստը ԱՄՆ-ի Սենթ Լուիս քաղաքում դուրս էր եկել Grand Chess Tour-ի եզրափակիչ փուլից Նիմանին պարտվելուց հետո: Նորվեգական VG պարբերականը հայտնել էր, որ Կարլսենն այդ որոշումն ընդունել է ամերիկացի հակառակորդին խարդախության մեջ կասկածելով։ Ընդ որում, նորվեգացին սեպտեմբերի 19-ին կրկին հանդիպել է Նիմանի հետ` Champions Chess Tour առցանց մրցաշարում և ի նշան բողոքի երկու քայլ հետո հանձնվել է։
«Ես հասկանում եմ Մագնուսի հիասթափությունը։ Ես իրոք քիչ բան եմ իմացել շատ բաների մասին։ Իմ կարծիքը ինչ-որ տեղ մեջտեղում է։ Ես իրոք կարծում եմ, որ Հանսը ամենամաքուրը չի եղել, երբ հարցը վերաբերում էր առցանց շախմատին, բայց նա երիտասարդ տղա է և հույս ունեմ, որ սա նրան դաս կլինի»,-ասել է Արոնյանը։
Ավելի վաղ Նիմանը խոստովանել էր, որ երբ 12 և 16 տարեկան է եղել, խարդախություն է արել երկու մրցաշարերում առցանց խաղի ժամանակ։ Շախմատիստը հայտարարել էր, որ իր գործողությունները սխալ են եղել, որի համար ինքը զղջում է։ Նիմանը նշել էր նաև, որ Կարլսենի դեմ խաղում երբեք խարդախություն չի արել։