ԵՐԵՎԱՆ, 19 սեպտեմբերի – Sputnik. Թուրքիան ԱՄՆ–ից ակնկալում է համագործակցություն Քրդստանի աշխատավոր կուսակցության, YPG ջոկատների և ընդդիմադիր քարոզիչ Ֆեթուլլահ Գյուլենի կազմակերպության հետ պայքարում։ Այս մասին, Anadolu–ի փոխանցմամբ, Նյու Յորքում թուրք–ամերիկյան ազգային համակարգող կոմիտեի նիստում հայտարարել է Թուրքիայի նախագահ Ռեջեփ Թայիփ Էրդողանը։
«Մենք ակնկալում ենք, որ Ամերիկայի մեր բարեկամները կհամագործակցեն մեզ հետ Քրդստանի աշխատավոր կուսակցության, YPG–ի և FETÖ–ի հետ պայքարում այնպես, ինչպես հարիր է դաշնակցային ոգուն։ Մենք մանրակրկիտ կատարում ենք սեփական նախաձեռնություններն ԱՄՆ իշխանությունների առաջ` FETÖ–ի ղեկավարին ու կազմակերպության անդամներին պատասխանատվության ենթարկելու համար»,–ասել է Էրդողանը։
Թուրքիայի իշխանությունները մեղադրում են Ֆեթուլլահ Գյուլենի կազմակերպությանը, որը նրանք անվանում են FETÖ (ֆեթուլլահականների կազմակերպություն) 2016 թվականի հուլիսին պետական հեղաշրջման փորձին առնչություն ունենալու համար։
Թուրքիայում խռովություններից հետո ավելի քան 80 մարդ էր ձերբակալվել, հեռացվել կամ աշխատանքից ազատվել էր մոտ 150 հազար պետական ծառայող, այդ թվում զինվորականներ։ Ինքը` Գյուլենը, որը գտնվում էր ԱՄՆ–ում, դատապարտել էր հեղաշրջման փորձն ու հերքել մեղադրանքները։