ԵՐԵՎԱՆ, 19 սեպտեմբերի – Sputnik. Հայ զինծառայող Դավիթ Գիշյանը, որը վիրավորվել և ադրբեջանական գերության մեջ էր հայտնվել, սպանվել է։ Sputnik Արմենիայի հետ զրույցում տեղեկությունը հաստատեց Միջազգային իրավական հարցերով ՀՀ ներկայացուցչության մամուլի խոսնակ Հասմիկ Սամվելյանը։
Նշենք, որ ադրբեջանական տելեգրամյան ալիքներում հայտնված տեսանյութից հարազատները ճանաչել էին ժամկետային զինծառայող, 2002թ․-ին ծնված Դավիթ Գիշյանին։ Տեսանյութում երևում էր, որ Դավիթը վիրավորում է ստացել ուսի շրջանում, իսկ ադրբեջանցիները իբրև թե «օգնություն են ցուցաբերում»։ Զինվորին, սակայն, օրերս ադրբեջանական կողմից ՀՀ–ին փոխանցած 32 դիերի մեջ ճանաչել են հարազատները։
«Մինչ օրս երբ խոսում էինք մեկ նույնականացված գերու մասին, հենց Դավիթ Գիշյանի մասին էր խոսքը։ Այսօր առավոտյան Եվրոպական դատարանին տեղեկացրել ենք նրա սպանության մասին և ասել, որ Ադրբեջանը կոպտորեն խախտել է Մարդու իրավունքների եվրոպական կոնվենցիայի 2-րդ հոդվածը` կյանքի իրավունքը։ Դիմել ենք նաև 3-րդ հոդվածով, որը խոշտանգումներից ու նվաստացուցիչ վերաբերմունքից է անձին պաշտպանում»,–ասաց Սամվելյանը։
Նրա խոսքով` ՄԻԵԴ–ն Ադրբեջանից պահանջել էր մինչև սեպտեմբերի 22-ը տեղեկություններ տրամադրել գերիների հետ կապված, և այսօր ՀՀ-ն ՄԻԵԴ–ից պահանջել է Ադրբեջանի նկատմամբ արագ կիրառել հրատապ միջոց։ Սամվելյանը հավելեց, որ այսօր դիմում է ուղարկվելու նաև ՄԱԿ-ի Արդարադատության միջազգային դատարան (Հաագայի դատարան)։
Միջազգային իրավական հարցերով ՀՀ ներկայացուցչության մամուլի խոսնակը նշեց, որ մյուս գերիների հետ կապված նույնպես դիմումներ են ներկայացրել ՄԻԵԴ և արդեն իսկ կան նույնականացված անձինք, սակայն զերծ մնաց թվեր ու տվյալներ հրապարակելուց։
Հիշեցնենք, որ սեպտեմբերի 13-ին, ժամը 00:05-ից Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաև ԱԹՍ-ներ:
Սեպտեմբերի 14-ին ադրբեջանցիները կրկին հրետակոծել են Ջերմուկն ու Վերին Շորժան, իսկ ավելի ուշ մարտերը վերսկսվել են նաև Սյունիքի մարզի Իշխանասարի հատվածում։
Սեպտեմբերի 14–ի երեկոյան ժամը 8–ից հայ–ադրբեջանական սահմանի երկայնքով պահպանվում է հրադադարի ռեժիմը։