ԵՐԵՎԱՆ, 18 սեպտեմբերի – Sputnik. Հռոմի Պապ Ֆրանցիսկոսը վշտակցություն է հայտնել Հայաստանի ու Ադրբեջանի սահմանին տեղի ունեցած բախումների կապակցությամբ և կոչ է արել կողմերին պահպանել հրադադարի ռեժիմը: Նրա խոսքը մեջբերում է ՌԻԱ Նովոստին։
«Վշտացած եմ Ադրբեջանի ու Հայաստանի միջև վերջերս տեղի ունեցած բախումներից։ Ես իմ հոգևոր մտերմությունն եմ հայտնում զոհվածների ընտանիքներին ու կոչ եմ անում կողմերին պահպանել հրադադարի ռեժիմը՝ հաշվի առնելով խաղաղ համաձայնագիրը», - հայտարարել է նա ավանդական կիրակնօրյա քարոզից հետո, որով նա դիմել է հավատացյալներին Վատիկանի Առաքելական պալատի պատուհանից:
«Չմոռանանք, որ խաղաղությունը հնարավոր է, երբ զենքը լռում է ու երկխոսություն է սկսվում», - ասել է քահանայապետը, հավատացյալներին առաջարկելով աղոթել «ուկրաինացի ժողովրդի ու պատերազմով արյունոտվածյուրաքանչյուր հողում խաղաղության համար»։
Հռոմի Պապը աջակցություն է հայտնել Իտալիայի Մարկե մարզի բնակչությանը, այնտեղ 11 մարդ ջրհեղեղների զոհ է դարձել:
Հիշեցնենք` սեպտեմբերի 13-ին, ժամը 00:05-ից Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում էր նաև ԱԹՍ-ներ:
Նիկոլ Փաշինյանը սեպտեմբերի 16–ի կառավարության նիստի ժամանակ հայտնեց, որ հայկական կողմի զոհերի ճշտված թիվը 135 է։
Սեպտեմբերի 14–ի ժամը 20։00–ից հայ–ադրբեջանական սահմանի երկայնքով հրադադարի ռեժիմ է սահմանվել, որը պահպանվում է մինչ այս պահը։