Փելոսիի այցը առիթ է արևմտամետ ուժերի կողմից հակառուսականություն տարածելու համար. Բադալյան

Թվում է, թե սահմանին տեղի ունեցան ընդամենը երկօրյա ընդհարումներ, սակայն իրականում առկա են աշխարհաքաղաքական բազմակողմանի խաղի դետալներ, որոնցից մեկը ՀՀ–ում հակառուսականության տարածումն է։ Sputnik Արմենիայի հետ զրույցում նման տեսակետ հայտնեց քաղտեխնոլոգ Արմեն Բադալյանը։

Սեպտեմբերի 16-ին Հայաստանում ՌԴ դեսպանատան մոտ մի խումբ քաղաքացիներ կազմակերպել էին բողոքի ակցիա, որի ընթացքում ոստիկանության աշխատակիցները նրանց անհապաղ հավաքը դադարեցնելու վերաբերյալ օրինական պահանջ ներկայացրին, իսկ հետո բերման ենթարկեցին երեք անձի։ Նույն օրը երեկոյան Հանրային հեռուստաընկերությանը տված հարցազրույցում ՀՀ ԱԺ նախագահ Ալեն Սիմոնյանն իր դժգոհությունն արտահայտեց ՀԱՊԿ–ի գործունեությունից։

Բադալյանի կարծիքով` առկա իրավիճակից օգտվում են արևմտյան կառույցների դրամաշնորհներից սնվող ՀԿ–ները, որոնք անդրկուլիսյան աջակցություն ստանալով իշխանություններից` իրականացնում են որոշակի հակառուսական գործողություններ։ Նրանք ակցիաներ են կազմակերպում մասնավորապես ՀՀ–ում Ռուսաստանի դեսպանատան մոտ։

«ԱՄՆ Ներկայացուցիչների պալատի խոսնակ Նենսի Փելոսիի հայաստանյան այցը նրանց համար նույնպես պատրվակ է դարձել, որովհետև Փելոսին անգլոսաքսոնական կոնգլոմերատի ներկայացուցիչն է, որն իր առջև նպատակ է դրել Հարավային Կովկասից դուրս մղել ռուսական ազդեցությունը։ Դրանից ոգևորված արևմտամետ ուժերը Հայաստանում ստանալով համապատասխան հրահանգ` սկսում են գեներացնել մարդկանց շրջանում առկա որոշակի դժգոհությունը` կապված Ռուսաստանի չեզոք վերաբերմունքի հետ»,– նշեց քաղտեխնոլոգը։

Հիշեցնենք` ոչ վաղ անցյալում ՀՀ–ում տարածվող հակառուսական տրամադրությունները հանգեցրել էին նրան, որ օգոստոսի 17-ին ՀՀ–ում ՌԴ դեսպանատունը Ռուսաստանի հասցեին արվող տեղեկատվական շահարկումների պատճառով նոտա էր հղել ՀՀ ԱԳՆ–ին։