ԵՐԵՎԱՆ, 18 սեպտեմբերի – Sputnik. ԱՄՆ Ներկայացուցիչների պալատի խոսնակն ու անդամները Հայաստանում ցանկանում են իրենց ակտիվ աջակցությունը հայտնել Հայաստանի ժողովրդավարությանը, տարածքային ամբողջականությանը և ինքնիշխանությանը։ Այս մասին Երևանում հայտարարեց ԱՄՆ Ներկայացուցիչների պալատի խոսնակ Նենսի Փելոսին։
«Այստեղ մենք կլսենք պաշտպանական համագործակցության ոլորտի պահանջները։ Այստեղ ենք նաև լսելու Հայաստանի ակնկալիքներն ու հարցերը, հասկանալու համար, թե ինչ կարող ենք անել։ Հայաստանի ժողովրդավարությունը, տարածքային ամբողջականությունը և ինքնիշխանությունը մեզ համար համարվում են կարևոր հարցեր և մենք ակտիվ աջակցություն ենք ցանկանում հայտնել։ Անշուշտ, որոշումը Հայաստանն է կայացնում։ Մենք այստեղ կարող ենք խոսել մեր պատրաստակամության մասին»,– նշեց Փելոսին։
Ֆրանկ Փալոն
© Sputnik / Asatur Yesayants
ԱՄՆ Ներկայացուցիչների պալատի էներգետիկ և կոմերցիոն հարցերով հանձնաժողովի նախագահ Ֆրանկ Փալոնն էլ նշեց, որ Հայաստանի` ՀԱՊԿ անդամ լինելու վերաբերյալ իրենք ոչինչ չեն ասում, միայն մտահոգված են Հայաստանի անվտանգությամբ։
«Մենք հասկանում ենք, որ Հայաստանը Ռուսաստանի հետ Անվտանգային կազմակերպության (նկատի ունի ՀԱՊԿ– խմբ.) մի մաս է։ Դրա հետ կապված որևէ բան չենք ասում, սակայն մենք շատ մտահոգված ենք Հայաստանի անվտանգությամբ և փորձում ենք հասկանալ, թե ինչ կարող է ԱՄՆ անել` առանց անդրադառնալու այդ ռազմական կազմակերպությանը»,– նշեց կոնգրեսականը։
Նշենք, որ Փելոսին Երևանում է պաշտոնական այցով։ Նա առաջին անգամ է Հայաստանում։ Ներկայացուցիչների պալատի խոսնակին ուղեկցում են ԱՄՆ Ներկայացուցիչների պալատի էներգետիկ և կոմերցիոն հարցերով հանձնաժողովի նախագահ Ֆրանկ Փալոնեն, ներկայացուցիչների պալատի անդամներ Աննա Էշուն և Ջեքի Սփիերը:
Երկօրյա այցով Հայաստան ժամանած ամերիկացի հյուրերն ընդլայնված կազմով հանդիպում են ունեցել Ազգային ժողովում։ Նախատեսվում է նաև հանդիպում լրատվամիջոցների և քաղաքացիական հասարակության ներկայացուցիչների, բարձրաստիճան պաշտոնյաների հետ հետ։