ԵՐԵՎԱՆ, 18 սեպտեմբերի – Sputnik. ԱՄՆ–ն դեմ է արտահայտվելու Հայաստանի սահմանների որևէ փոփոխության։ Այս մասին Երևանում հայտարարել է ԱՄՆ Ներկայացուցիչների պալատի անդամ Ջեքի Սփիերը` մեկնաբանելով հայ–ադրբեջանական սահմանին տեղի ունեցող իրադարձությունները։
Սփիերը Հայաստան է ժամանել ԱՄՆ Ներկայացուցիչների պալատի խոսնակ Նենսի Փելոսիի գլխավորած պատվիրակության հետ։
Սփիերը հիշեցրեց, որ ԱՄՆ–ում իրենք բանաձև են առաջ քաշել, որով դատապարտվում են ադրբեջանական գործողությունները։
«Հուսով եմ, որ այդ բանաձևով մենք առաջ կշարժվենք։ Ինչ վերաբերում է Հայաստանի վերաբերյալ մեր պատասխանատվությանը, ապա կշարունակենք աջակցել Հայաստանի ինքնիշխանության ու տարածքային ամբողջականությանը։ ԱՄՆ-ն դեմ կարտահայտվի Հայաստանի սահմանների որևէ փոփոխությանը»,– ասաց քաղաքական գործիչը։
Նշենք, որ Փելոսին Երևանում է պաշտոնական այցով։ Նա առաջին անգամ է Հայաստանում։ Ներկայացուցիչների պալատի խոսնակին ուղեկցում են ԱՄՆ Ներկայացուցիչների պալատի էներգետիկ և կոմերցիոն հարցերով հանձնաժողովի նախագահ Ֆրանկ Փալոնեն, ներկայացուցիչների պալատի անդամներ Աննա Էշուն և Ջեքի Սփիերը:
Երկօրյա այցով Հայաստան ժամանած ամերիկացի հյուրերն ընդլայնված կազմով հանդիպում են ունեցել Ազգային ժողովում։ Նախատեսվում է նաև հանդիպում լրատվամիջոցների և քաղաքացիական հասարակության ներկայացուցիչների, բարձրաստիճան պաշտոնյաների հետ հետ։