ԵՐԵՎԱՆ, 17 սեպտեմբերի – Sputnik. ԳԴՀ նորանշանակ փոխդեսպան, ներկայում գործերի ժամանակավոր հավատարմատար Էրիկ Թինտրուպը ցնցված է ավերածությունների այն պատկերից, որ տեսել է Ջերմուկում, տեղեկանում ենք Հայաստանում Գերմանիայի դեսպանության ֆեյսբուքյան էջից։
Նշենք, որ երեկ շուրջ 50 դիվանագետներ ԶՈւ գլխավոր շտաբի պետի հետ այցելել էին Ջերմուկ։ Այնտեղ ՀՀ ԳՇ պետ Էդվարդ Ասրյանը նրանց ներկայացրեց ադրբեջանական հարձակման հետևանքներն ու նրանց գործած վայրագությունները։ Նա ասաց, որ թշնամին մխրճվել է ՀՀ ինքնիշխան տարածք 8.5 կիլոմետր լայնությամբ ճակատով՝ մինչև 7.5 կիլոմետր խորությամբ։ Ասրյանը դիվանագետներին ոչ միայն պատմեց, այլև ցույց տվեց տեսանյութը, որտեղ երևում է, թե ինչպես են ադրբեջանցիները խոշտանգում զինծառայողներին, այդ թվում նաև կանանց։
«Ջերմուկը բնության մեջ տեղակայված գեղատեսիլ, խաղաղ հանգստավայր է։ Երեքշաբթի այստեղ գերմանացի զբոսաշրջիկներ էլ կային։ Այն, որ բնակիչներից ոչ ոք չի զոհվել, գրեթե հրաշքի է նման, քանի որ հրետանային կրակոցները խփել են այս՝ սահմանից կիլոմետրեր հեռու գտնվող ռեստորանների և ճոպանուղու ուղղությամբ, ընդամենը մի քանի հարյուր մետր բնակելի շենքերից ու զբոսաշրջիկներով լի հյուրանոցներից հեռու»,-այցի ընթացքից իր տպավորություններն է հայտնել Էրիկ Թինտրուպը։
Նրա խոսքով` պայթյուններն այնքան մոտ են եղել, որ գերմանուհի զբոսաշրջիկն իր հյուրանոցի սենյակից կարողացել է լուսանկարել դրանք.
«Ես չափազանց մտահոգ եմ։ Մենք ապրումակցում ենք հայ ժողովրդին»,–գրել է փոխդեսպանը։
Հիշեցնենք` սեպտեմբերի 13-ին, ժամը 00:05-ից Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաև ԱԹՍ-ներ:
Սեպտեմբերի 14-ին ադրբեջանցիները կրկին հրետակոծել են Ջերմուկն ու Վերին Շորժան, իսկ ավելի ուշ մարտերը վերսկսվել են նաև Սյունիքի մարզի Իշխանասարի հատվածում։
Նիկոլ Փաշինյանը սեպտեմբերի 16–ի կառավարության նիստի ժամանակ հայտնեց, որ հայկական կողմի զոհերի ճշտված թիվը 135 է։
Սեպտեմբերի 14–ի ժամը 20։00–ից հայ–ադրբեջանական սահմանի երկայնքով հրադադարի ռեժիմ է սահմանվել, որը պահպանվում է մինչ այս պահը։