ԵՐԵՎԱՆ, 16 սեպտեմբերի – Sputnik. Իրենք ուզում են, որ Հայաստանը չլինի։ Հանրային հեռուստաընկերությանը տված հարցազրույցում հայտարարեց ՀՀ ԱԺ նախագահ Ալեն Սիմոնյանը` պատասխանելով հարցին, թե ի՞նչ է ուզում Ադրբեջանը, որ Հայաստանը չի տալիս բանակցություններով։
«Իրենք ամեն ինչ են ուզում, իրենք ուզում են, որ Հայաստանը չլինի, իրենք ուզում են, որ հայերը չլինեն, իրենք ուզում են, որ տարածաշրջանում մնան միայն իրենք և Թուրքիան, և այդ ուղղությամբ անում են ամեն ինչ։ Հենց մենք ինչ–որ բան ենք սկսում քննարկել, ինքը հրաժարվում է դրանից, մի քայլ առաջ է անում ու այլ բան է ուզում, և այդ գործելաոճը զուգորդվում է ռազմական քայլերով, ռազմական ճնշման փորձերով։ Այսօր մենք ցուցադրել ենք, որ այս ճանապարհով այլևս չենք գնալու, և դրա մասին է մեր զինվորների կռիվը, և դրա մասին են մեր այն հայտարարությունները, որ այլևս մենք պատրաստ են քննարկել խաղաղության պայմանագիրը առանց նախապայմանների, և ոչ մի բան ավել »,– ասաց Սիմոնյանը։
Հիշեցնենք, որ սեպտեմբերի 13-ին, ժամը 00:05-ից Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաև ԱԹՍ-ներ:
Սեպտեմբերի 14-ին ադրբեջանցիները կրկին հրետակոծել են Ջերմուկն ու Վերին Շորժան, իսկ ավելի ուշ մարտերը վերսկսվել են նաև Սյունիքի մարզի Իշխանասարի հատվածում։
Նիկոլ Փաշինյանը սեպտեմբերի 16–ի կառավարության նիստի ժամանակ հայտնեց, որ հայկական կողմի զոհերի ճշտված թիվը 135 է։
Սեպտեմբերի 14–ի ժամը 20։00–ից հայ–ադրբեջանական սահմանի երկայնքով հրադադարի ռեժիմ է սահմանվել, որը պահպանվում է մինչ այս պահը։