ԵՐԵՎԱՆ, 16 սեպտեմբերի - Sputnik. Հայաստանի և Ադրբեջանի սահմանին տեղի ունեցած միջադեպը ոչ մի կապ չունի Ղարաբաղի հետ։ Այս մասին հայտարարել է Ռուսաստանի նախագահ Վլադիմիր Պուտինը Սամարղանդում ՇՀԿ գագաթնաժողովի շրջանակներում լրագրողների հետ կայացած զրույցում:
«Սահմանային վերջին միջադեպը Ղարաբաղի հետ ընդհանրապես կապ չունի, դա բոլորովին այլ տարածաշրջանում է`Հայաստանի և Ադրբեջանի սահմանին»,-ասել է Պուտինը:
Ռուսաստանի նախագահն ընդգծել է, որ սահմանային հակամարտությունը հաջողվել է տեղայնացնել նաև Ռուսաստանի ազդեցությամբ:
«Մենք ցավում ենք դրա և, իհարկե, այնտեղի զոհերի համար: Այդ թվում և նախևառաջ Ռուսաստանի ազդեցությամբ այս հակամարտությունը հաջողվեց տեղայնացնել, հուսով եմ ՝ այսուհետ էլ այդպես էլ կլինի»,-ասել է Պուտինը:
Հիշեցնենք` սեպտեմբերի 13-ին, ժամը 00:05-ից Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաև ԱԹՍ-ներ:
Սեպտեմբերի 14-ին ադրբեջանցիները կրկին հրետակոծել են Ջերմուկն ու Վերին Շորժան, իսկ ավելի ուշ մարտերը վերսկսվել են նաև Սյունիքի մարզի Իշխանասարի հատվածում։
Նիկոլ Փաշինյանը սեպտեմբերի 16–ի կառավարության նիստի ժամանակ հայտնեց, որ հայկական կողմի զոհերի ճշտված թիվը 135 է։
Սեպտեմբերի 14–ի ժամը 20։00–ից հայ–ադրբեջանական սահմանի երկայնքով հրադադարի ռեժիմ է սահմանվել, որը պահպանվում է մինչ այս պահը։