ԵՐԵՎԱՆ, 16 սեպտեմբերի – Sputnik. ԱՄՆ պետքարտուղար Էնթոնի Բլինկենը հույս ունի տարածաշրջանում առկա իրավիճակի հարցով շուտով նոր շփումներ ունենալ Հայաստանի և Ադրբեջանի առաջնորդներ Նիկոլ Փաշինյանի և Իլհամ Ալիևի հետ։ Այս մասին հայտարարել է Պետդեպի պաշտոնական ներկայացուցիչ Նեդ Փրայսը։
«ԱՄՆ պետքարտուղարն օրեր առաջ զրուցել է երկու երկրների առաջնորդների հետ և կարելի է ակնկալել, որ առաջիկայում նա կրկին նման հնարավորություն կունենա», – ասել է Փրայսը։
Նշենք, որ սեպտեմբերի 13–ի գիշերը ՀՀ վարչապետ Նիկոլ Փաշինյանը հեռախոսազրույց էր ունեցել ԱՄՆ պետքարտուղար Էնթոնի Բլինկենի հետ։ Վարչապետը մանրամասներ էր ներկայացրել Ադրբեջանի կողմից Հայաստանի ինքնիշխան տարածքի նկատմամբ ձեռնարկված ագրեսիայի առնչությամբ:
Նույն գիշերը ԱՄՆ պետքարտուղարը հեռախոսազրույց էր ունեցել Ադրբեջանի նախագահ Իլհամ Ալիևի հետ, կոչ արել դադարեցնել ռազմական գործողությունները և ընդգծել, որ Միացյալ Նահանգները պնդելու է ռազմական գործողությունների անհապաղ դադարեցումը և Հայաստանի ու Ադրբեջանի միջև խաղաղ կարգավորումը։
Հիշեցնենք` սեպտեմբերի 13-ին, ժամը 00:05-ից Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաև ԱԹՍ-ներ:
Սեպտեմբերի 14-ին ադրբեջանցիները կրկին հրետակոծել են Ջերմուկն ու Վերին Շորժան, իսկ ավելի ուշ մարտերը վերսկսվել են նաև Սյունիքի մարզի Իշխանասարի հատվածում։
Նիկոլ Փաշինյանը խորհրդարանում հարցուպատասխանի ժամանակ հայտնել է, որ սեպտեմբերի 14–ի դրությամբ հայկական կողմն ունի 105 զոհ։
Սեպտեմբերի 15-ի ժամը 22:00-ի դրությամբ հայ-ադրբեջանական սահմանին էական միջադեպեր չեն գրանցվել։