ԵՐԵՎԱՆ, 15 սեպտեմբերի – Sputnik. Դիեր վերադարձնելու նպատակով Սյունիքի Ներքին Հանդ գնացած փրկարարներից մեկի հետ կապը կորել է։ Տեղեկությունը ֆեյսբուքյան իր էջում հայտնել է ԱԻՆ մամուլի խոսնակ Հայկ Կոստանյանը։
«Հայտնում եմ, որ ԱԻՆ փրկարար ծառայողները խմբով գնացել են Սյունիքի մարզի Ներքին Հանդ գյուղի տարածք դիեր վերադարձնելու, խմբի մի մասը վերադարձել է, իսկ փրկարար ծառայողներից մեկի հետ մինչ այս պահը կապ հաստատել չի հաջողվել»,–ասված է գրառման մեջ։
ԱԻՆ–ից հավելում են, որ նորություն լինելու դեպքում հավելյալ տեղեկություն կտրամդրեն։
Նշենո, որ սոցցանցերում տեղեկություն էր տարածվել, որ Սյունիք մեկնած ԱԻՆ–ի և Շտապօգնության աշխատակիցներ են գերի ընկել։
Հիշեցնենք, որ սեպտեմբերի 13-ին, ժամը 00:05-ից Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաև ԱԹՍ-ներ:
Սեպտեմբերի 14-ին ադրբեջանցիները կրկին հրետակոծել են Ջերմուկն ու Վերին Շորժան, իսկ ավելի ուշ մարտերը վերսկսվել են նաև Սյունիքի մարզի Իշխանասարի հատվածում։
Նիկոլ Փաշինյանը խորհրդարանում հարցուպատասխանի ժամանակ հայտնել է, որ սեպտեմբերի 14–ի դրությամբ հայկական կողմն ունի 105 զոհ։
Սեպտեմբերի 15–ի ժամը 11–ի դրությամբ հայ-ադրբեջանական սահմանին էական միջադեպեր չեն արձանագրվել: