ՄԱԿ-ի ԱԽ-ն այսօր կրկին կքննարկի հայ-ադրբեջանական սահմանին տիրող իրավիճակը

ԵՐԵՎԱՆ, 15 սեպտեմբերի - Sputnik. Միավորված ազգերի կազմակերպության Անվտանգության խորհուրդը այսօր՝ սեպտեմբերի 15-ին, կրկին կքննարկի հայ-ադրբեջանական սահմանին տիրող իրավիճակը։ Այս մասին նշված է ՄԱԿ ԱԽ նիստի օրակարգում։

Նշվում է, որ քննարկումը նախատեսվում է անցկացնել ՄԱԿ-ում Հայաստանի մշտական ներկայացուցչի նամակի առնչությամբ։

Հիշեցնենք՝ ՄԱԿ-ի Անվտանգության խորհրդում սեպտեմբերի 14-ին քննարկման ժամանակ բոլորը կողմ են արտահայտվել Հայաստանի և Ադրբեջանի միջև կրակի շուտափույթ դադարեցմանը, ինչպես նաև քաղաքական-դիվանագիտական միջոցներով իրավիճակի կարգավորմանը, ավելի վաղ հայտնել է ՄԱԿ-ում ՌԴ մշտական ներկայացուցիչ Վասիլի Նեբենզյան։

Հավելենք, որ ՄԱԿ-ի ԱԽ-ում նախագահում է Ֆրանսիան։

Սեպտեմբերի 13-ին, ժամը 00:05-ից Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաև ԱԹՍ-ներ:

Սեպտեմբերի 14-ին ադրբեջանցիները կրկին հրետակոծել են Ջերմուկն ու Վերին Շորժան, իսկ ավելի ուշ մարտերը վերսկսվել են նաև Սյունիքի մարզի Իշխանասարի հատվածում։

Ժամը 20-ից հետո կրակը բոլոր ուղղություներով գրեթե դադարել է, էական միջադեպեր չեն արձանագրվել, հայտնել են ՊՆ-ից։

Նիկոլ Փաշինյանը խորհրդարանում հարցուպատասխանի ժամանակ հայտնել է, որ սեպտեմբերի 14–ի դրությամբ հայկական կողմն ունի 105 զոհ։