ԵՐԵՎԱՆ, 14 սեպտեմբերի – Sputnik. Հաղորդակցությունների ապաշրջափակման հարցով Ռուսաստանի, Հայաստանի և Ադրբեջանի եռակողմ աշխատանքային խմբի նիստին Մոսկվան «փաթեթային» պայմանավորվածության հույս ունի։ Այս մասին ՌԻԱ Նովոստիին տված հարցազրույցում հայտարարել է ՌԴ ԱԳՆ-ի ԱՊՀ երկրների չորրորդ դեպարտամենտի տնօրեն Դենիս Գոնչարը։
«Հայ–ադրբեջանական կարգավորման առանցքային տարրերից մեկը տարածաշրջանում տրանսպորտային հաղորդակցությունների վերականգնումն է։ Եռակողմ աշխատանքային խմբի շրջանակում համաձայնեցվում է հիմնական նախագծերի փաթեթը` շեշտը դնելով հարևան երկրներ դուրս գալու հնարավորությամբ Հայաստանի և Ադրբեջանի միջև երկաթուղային և ավտոմոբիլային հաղորդակցության գործարկման վրա», – ասել է նա։
Նման նախագծերի թվին է պատկանում նաև երկաթուղու, ինչպես նաև ՀՀ Սյունիքի մարզով Ադրբեջանի արևմտյան շրջանների և Նախիջևանի միջև ավտոմայրուղու կառուցումը։
Դիվանագետը հույս ունի, որ եռակողմ խմբի հերթական նիստի ժամանակ հնարավոր կլինի փաթեթային պայմանավորվածություն ձեռք բերել։
Դրանից հետո կոնկրետ ծրագրերի իրականացման մեկնարկ կտրվի, որին կկարողանան միանալ շահագրգիռ բոլոր ընկերությունները։ Գոնչարը համոզված է, որ մրցույթների շրջանակում մասնակիցների թվում նաև ռուսական օպերատորներ կլինեն։