ԵՐԵՎԱՆ, 14 սեպտեմբերի – Sputnik. Կանանց ու երեխաներին դուրս են բերել Սյունիքի Իշխանասար գյուղից։ Այս մասին հայտնում է Sputnik Արմենիայի թղթակիցը։
Այսօր առավոտյան և ցերեկը Ադրբեջանի ԶՈւ կողմից հրետակոծությունները համանուն լեռան շրջանում շատ ավելի ինտենսիվ են եղել։ Այդ պատճառով կանանց ու երեխաներին որոշել են ավելի ապահով վայր ուղարկել։
Ժամը 19։00-ի սահմաններում կրակահերթերը դադարել են, սակայն այժմ այդ շրջանում կրկին (առայժմ հազվադեպ կրակոցներ) հրետանի է կիրառվել։
Հիշեցնենք` սեպտեմբերի 13-ին, ժամը 00:05-ից Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաև ԱԹՍ-ներ:
Այսօր ժամը 8։00–ից ադրբեջանցիները կրկին հրետակոծում են Ջերմուկն ու Վերին Շորժան, իսկ ավելի ուշ մարտերը վերսկսվել են նաև Սյունիքի մարզի Իշխանասարի հատվածում։
Նիկոլ Փաշինյանը խորհրդարանում հարցուպատասխանի ժամանակ հայտնեց, որ սեպտեմբերի 14–ի դրությամբ հայկական կողմն ունի 105 զոհ։