ԵՐԵՎԱՆ, 14 սեպտեմբերի – Sputnik. Նախորդ օրը կեսգիշերից Հայաստանում ռազմական դրություն հայտարարելու նախագիծը գտնվում է ՀՀ վարչապետ Նիկոլ Փաշինյանի սեղանին։ Փաշինյանն այդ մասին հայտնեց ԱԺ–ում կառավարության հետ հարցուպատասխանի ժամանակ` պատասխանելով հարցին, թե արդյո՞ք ՀՀ–ում ռազմական դրություն մտցնելու կարիք չկա։
«Անվտանգության խորհրդի և այլ ֆորմատներով գնահատում ենք իրավիճակը և նման որոշում կայացնելու անհրաժեշտությունը։ Քանի այդ որոշումը չենք կայացրել, գտնում ենք, որ նման որոշման անհրաժեշտություն չկա ոչ թե այն պատճառով, որ ագրեսիա չկա, այլ որովհետև այն շատ լուրջ որոշում է»,–ասաց Փաշինյանը։
Փաշինյանը հավելեց` այս պահին նման որոշում չի կայացվել, սակայն դա չի նշանակում, որ հաջորդ պահին նման որոշում չի ընդունվի` կախված ստեղծված իրավիճակից։
Հիշեցնենք` սեպտեմբերի 13-ին, ժամը 00:05-ից Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաև ԱԹՍ-ներ:
Այսօր ժամը 8։00–ից ադրբեջանցիները կրկին հրետակոծում են Ջերմուկն ու Վերին Շորժան, իսկ ավելի ուշ մարտերը վերսկսվել են նաև Սյունիքի մարզի Իշխանասարի հատվածում։
Նիկոլ Փաշինյանը խորհրդարանում հարցուպատասխանի ժամանակ հայտնեց, որ սեպտեմբերի 14–ի դրությամբ հայկական կողմն ունի 105 զոհ։