ԵՐԵՎԱՆ, 13 սեպտեմբերի – Sputnik. Վայոց Ձորի Ջերմուկ քաղաքի անտառային հատվածում հրդեհ է բռնկվել, տեղեկությունը Sputnik Արմենիայի հետ զրույցում հայտնեց ԱԻՆ մամուլի քարտուղար Հայկ Կոստանյանը։
«Ենթադրաբար հրդեհները հակառակորդի ռմբակոծության հետևանք են։ Այն հատվածները, որոնք հակառակորդի կողմից դիտարկվում են, փրկարար ծառայությանը չի հաջողվում հրդեհաշիջման աշխատանքներ անել։ Իսկ մյուս հատվածներում հրդեհաշիջման աշխատանքներ են իրականացվում»,–ասաց նա։
Կոստանյանը հավելեց, որ այս պահին հրդեհի չորս օջախ կա։
Հիշեցնենք` ՀՀ պաշտպանական գերատեսչությունը հաղորդագրություն էր տարածել` հայտնելով, որ սեպտեմբերի 13-ին՝ ժամը 00:05-ից, Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաև ԱԹՍ-ներ: Կան զոհեր ու վիրավորներ։
Սահմանին լարված իրավիճակը պահպանվում է։