ԵՐԵՎԱՆ, 13 սեպտեմբերի – Sputnik. Հայաստանի դիրքերի և բնակավայրերի ուղղությամբ ադրբեջանական սադրանքը չի ազդել քաղավիացիայի աշխատանքի վրա, օդային սահմանը բաց է։ Այս մասին Sputnik Արմենիային հայտնեց ՀՀ քաղաքացիական ավիացիայի կոմիտեի նախագահի օգնական Լիլիթ Աղաբեկյանը։
«Թռիչքներն իրականացվում են ըստ գրաֆիկի, փոփոխություններ չկան։ Օդային սահմանի փակվելու վերաբերյալ պաշտոնական որևէ հրաման կամ տեղեկություն չկա»,– հայտնեց Աղաբեկյանը։
Հիշեցնենք` ՀՀ պաշտպանական գերատեսչությունը հաղորդագրություն էր տարածել` հայտնելով, որ սեպտեմբերի 13-ին՝ ժամը 00:05-ից, Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաև ԱԹՍ-ներ: Կան զոհեր ու վիրավորներ։
ՀՀ վարչապետն ԱԺ–ում հարցուպատասխանի ժամանակ հայտնեց, որ զոհերի ճշտված թիվն այս ժամի դրությամբ 49 է։
Այս պահի դրությամբ իրավիճակը սահմանին շարունակում է լարված մնալ։